«Таза республик» проектын координаторжо ден волонтёр-медик-влак Йошкар-Оласе Касвел уремыште верланыше 21-ше, 23-шо да 23-шо А №-ан пӧрт-влак воктене Тазалык пунктын пашажым организоватленыт.
Ныл шагат жапыште медицине специалист ден волонтёр-медик-влак 60 утла пациентын тазалыкшым тергеныт, эмлалтме да черланыме деч аралалтме шотышто ой-каҥашым темленыт.
Социально кӱлешан проект-влакын координаторышт Дмитрий Груздев ден Максим Сильдуганов рӱдоласе калыкын илышыжым саемдымашке виктаралтше мероприятийлаште кеҥеж мучко чолган участвоватлат.
– Таче ме приёмыш толшо пациент-влакын тазалыкыштым келгынрак шымлышна, кажныжлан гаяк профессиональный медицине темлымашым пуышна. Мыйын шонымаште, кажне еҥ медицине услуго дене элнан чыла лукыштыжо пайдаланен кертшаш, да тиде кызыт эркын дене шукталтеш. Медперсонал ден волонтёр-влаклан тыгай кугу да кӱлешан пашам шуктымыштлан тауштем, а калыклан пеҥгыде тазалыкым тыланем, – манеш Йошкар-Ола округысо депутат-влак погынын депутатше, Республикысе йоча клинический больницын тӱҥ врачше Д.Груздев.
– Шке тазалыкым эскерымаш – сай койыш, тудо кажне айдемын лийшаш. Марий Элым вуйлатыше Юрий Зайцевын тӱҥалтышыж почеш илышыш пуртымо «Таза республик» проект рӱдоласе калыклан пӧрт кудывечыштак диспансеризацийын икымше йыжыҥжым эрташ йӧным ышта. Шке тазалыкшылан да илышыжлан мутым кучышо кажне еҥ тидым сай велым акла да йӧн дене пайдаланашак тырша, – манеш М.Сильдуганов.
Марий Элым вуйлатышын «Таза республик» проектше дене кылдалтше мероприятий ден «Тазалык пункт» акций-влак нерген регионысо Тазалык аралтыш министерствын официальный лаштыклаштыже да социальный кыллаште пален налаш лиеш. Увертарымашым пӧрт подъездлаштат сакалтылыт.
М.ИВАНОВА
«Марий Эл» увер агентствын фотожо
