11 июльышто 12 шагатлан Морко район Унчо ялысе мер отышто Сӱрем кумалтыш лиеш.
Эрвел марий-влак ты пагытыште Кӱсӧ кумалтышым эртарат гын, Морко марий-влак – Сӱремым. Тудо моткоч шкешотан да ойыртемалтше, шуко йӱла гыч шога. Тӱҥ шотышто Петро кече дене келшен толеш. Верысе администрацийым вуйлатыше Иван Евсеевын палемдымыж почеш, тений кумалтыш кум тулолмо дене лиеш. Тушко Морко район гыч веле огыл, тыгак Параньга, Марий Турек, Шернур, Советский районла, Татарстан Республик гыч кумылан-влак ушнат. Кумалтышым Унчо кундемын тӱҥ онаеҥже Анатолий Яковлев виктарен шога.
Ожнысек Сӱрем пайремын ик ойыртемже лийын: марлан кайышашлык ӱдыр-влак Сӱрем пучым пуалтеныт. «Кызыт тыгай йӱла тендан дене аралалт кодын мо?» манын йодмылан Иван Михайлович тыгерак вашештышт: «Сӱрем пучшо уке огыл, но пуалтышыже уке улыт. Ты йӱла изиш мондалтын».
Сӱрем кумалтышыш мияш кумылан-влакым Унчо кундемыште поро кумылын вучат.
Снимкыште: Сӱрем кумалтышыште.
Алевтина Байкован фотожо.
