Пеледыш пӱртӱсын ик эн мотор кушкылжылан шотлалтеш, садланак тудым ме йырваш ужына: пакчаште, пӧртыштӧ… Адакшым кеч-могай пайремыш каена гынат, пеледышым налына, йӧратыме але лишыл еҥлан пӧлеклена.
Марий мурызо, артист да палыме еҥ-влак могай пеледышым йӧратат?
Маргарита Медикова, Российын сулло, Марий Элын калык артистше:
– Мылам чыла пеледышат келша, кажныже мотор, кумылым нӧлта.
Наталья Зуевас, Марий Элын сулло артистше:
– Артист-влак пеледышым поснак чот йӧратат. Мутлан, сценыште лийме годым иктаж-кӧ пӧлекла гын, кумыл нӧлталтеш веле огыл, пашам ышташ вий ешаралтмыла чучеш! Пеледыш сӧраллыкше дене веле огыл, тамле пушыж денат чоным куандара. Мылам хризантеме моткоч келша. Тудо мотор да вазыштат кужун шога.
Людмила Атласкина, Курыкмарий драме театрын вуйлатышыже:
– Чыла пеледышым йӧратем, сандене пакчашкем тӱрлым-тӱрлым шындаш тыршем. Нуным ончен, чонем йывырта. Мылам пион, роза, гортензий чот келшат. А 8 Март пайремлан тюльпан утларак келшен толеш, тудо шошо тӱҥалтышым сӧрастара.
Мария Тимиряева, мурызо, «Эреҥер» калык муро ансамбльын солистше:
– Ош розам, хризантемым, герберым йӧратем.
Наталия Дудина, Я.Эшпай лӱмеш Марий кугыжаныш филармонийын сылнымут-драме ужашым вуйлатыше, экскурсовод:
– Эн мотор пеледышлан вис-висым шотлем. Тыгай аршаш моткоч моторын, кечыла коеш. Ошо да нарынче тӱсшӧ ныжыл кумылым луктеш, чылт марий вате гае, чонжо ошо да кумылжо кече гае волгыдо. Вис-вис чайымат пеш йӧратем, тудым кажне кастене йӱам, адакшым чурийымат мушкаш пайдале.
Татьяна Кибаева, самырык мурызо, блогер:
– Пионым эн чот йӧратем. Мотор, ныжыл пеледыш, пушыжат чот келша. Шошым тюльпан чонемлан лишыл, а кеҥежым – пасушто пеледше вис-вис.
А.БАЙКОВА
