КУЛЬТУР ДА ИСКУССТВО ЭСТРАДЕ

Пӧртйымал тичат ямдылат

Кеҥеж телым пукша, маныт. Тидым шотыш налын, кажне гаяк ешыште телылан шапаш кочкышым ямдылат: поҥго але тӱрлӧ пакчсасаска гыч салатым ямдылат, тыгак нуным шинчалтат, мариноватлат, а тӱрлӧ емыж ден саска гыч вареньым шолтат, компотым ыштат.

Йолташна-влак телылан могай шапашым утларак ямдылат?

 Надежда МИШИНА, Марий Эл тӱвыран сулло пашаеҥже:

– Шуко озавате семын мыламат «Лечо», «Аджика» салат-шамычым ямдылаш келша, киярымат, помидорымат ятырак мариноватлена. Ешыштем кол консервымат, мариноватлыме ужар пурсамат пеш йӧратат.

Чылажге ончалаш гын, пӧртйымал тичат погына, очыни.

Надежда ВАСКАНОВА, Эл тӱвыран сулло пашаеҥже, мурызо:

– Йӱштӧ теле кечын кылмыктыме камер гыч сакырложаш дене йӧре оптен шындыме модым, снегым, шем шоптырым, мӧрым але эҥежым лукмеке, ямле кеҥеж пагытыш ик жаплан пӧртылат. Тиддеч посна поҥгым, ужар шоганым, укропым, тёркеш нӱжымӧ кешырым кылмыкташ оптем.

Мариноватлыме кияремат уло еш дене телым йӧратен кочкына. Тудым тыге ямдылем: кум литран банке пундашке шем шоптырын, вишньын 2-3 лышташыжым, укроп зонтым, крен лышташым пыштем да киярым теммешке оптем. Тиддеч вара ӱмбакыже шолшо вӱдым опталам да иктаж лу минут шинчыктем. Вӱдым каструльыш опталын налам да угыч шолташ пуртем. Тиде жапыште кияран банкыш 2 кугу совла шинчалым, 4 кугу совла сакырложашым, душистый манме ден шем пурыс (3-4) ден гвоздике (2-3) пырчым, 4 лавр лышташым пыштем. Каструльысо вӱд шолаш пурымеке, кияр ӱмбаке опталам да банкым тарватылын сакырложаш ден шинчалым шулыктарем. Ямде лиймеке, одеял дене леведам.

Галина ЯКУШЕВА, мурызо:

– Телылан шапашым шешкым дене коктын ямдылена. Иктаж 30 наре банке киярым мариноватленна. Шере пурыс ден баклажанынат лектышыже пеш сай.

Тений помидорат пеш сайын шочын, тудо да моло пакчасаска дене «Лечо» салатым ямдылена. Телым тудын дене борщым шолтена да уло еш дене йӧратен кочкына.

Лишыл жапыште йошкар ломбыгичке гыч компотым ямдылаш шонена.

Йӱштӧ телым сакырложашеш луген оптымо эҥыж дене чайым йӱаш келша. тудо тамле да моткоч пайдале.

Татьяна ХЛОБЫСТОВА, «Марий Эл» ГТРК-н радиожурналистше:

– Тений Курыкмарий район гыч вишньым шуко поген конденам. Тудын дене компотым ямдыленам. Шернур районыштем погымо олык мӧр дене вареньым шолтенам.

Чыла гаяк емыж-саскам кылмыктыме камерыш пыштенам.

Кызыт киярым шинчалтыме тургым. Кумшо ий авамын рецептше почеш тудым йӱштӧ вӱд дене шинчалтем. Ко кочкын ончен гын, чылалан пеш келша.

Фотом интернет гыч налме

А.БАЙКОВА ямдылен

 

Опубликовать в Одноклассники

Добавить комментарий