23 февральыште Советский районысо тӱвыра пӧртыштӧ «Сеҥымашлан ӱшанен мурена» поро кумылым ончыктымо концерт лийын.
Тудым Морко районышто шочын-кушшо поэт, писатель, артист да моло чолга еҥ-влак эртареныт. Программе почеш муро ден куштымаш, сылне сем ден поэзий корныла кумылым нӧлтеныт.
Тыгай концертым эртарен колташ Марий Эл тӱвыран сулло пашаеҥже, поэтессе Зоя Висвис тӱҥалтышым ыштен.
– Спецоперацийыште тукым шольым Александр Тимофеев лийын. Кредалмаште кум ий ончыч илыш дене чеверласен. Тиддеч вара СВО-што улшо-влаклан полшаш шонымаш лектын. Кодшо ийын Ӱшӱттӱр ял пайремыште герой-влакын ача-аваштлан пӧлекым кучыктенна. Тыгай тат шӱмым моткочак иша да полшаш шонымо кумылым эшеат луктеш, – чонжым почеш Зоя Александровна. – Тиддеч вара Марий Элын калык артистше, драматург Зинаида Долгова дене пырля поро кумылым ончыктымо концертым эртараш мутланен келшышна.
Икымше гана концертым эртыше ийын 14 ноябрьыште Моркышто эртареныт. Зал тич погынышо калык деч чумыргышо шийвундо дене «Калык фронтын» полшымыж дене СВО-што улшо-влаклан РЭБ системын ужашыжым да пиломатериалым колтеныт.
– Тунам Йошкар-Ола гыч артист-влакым кондаш Морко землячестве автобуслан шийвундым ойырен. Морко администрацийын да тӱвыра пӧртын пашаеҥже-влакын пешак порын вашлиймыштлан моткоч кугу тау. А ончаш толшо-влак залыште шыҥ-шыҥ лийыныт, – ешарыш Зоя Тимофеева. – Советскийыштат поро шонымаш дене калык зал тич погынен. Ты ганат погынышо шийвундо СВО-што улшо-влаклан полыш семын колталтеш.
Спецоперацийыш Зоя Висвисын эше вес тукым шольыжат, Дима, каен. Чаманаш кодеш, тудо кодшо идалык мучаште увер деч посна йомын. Тидыжат поэтессын чонжым йӱдшӧ-кечыже туржеш да полшаш кӱлмӧ шонымашым эшеат чот пеҥгыдемда.
– Поро пашаш ушнышо чыла калыклан кугу таум каласем. Сеҥымашлан ӱшаным огына йомдаре, – ойла тудо.
Алевтина БАЙКОВА
Зоя Тимофееван фотожо
