Йошкар-Оласе 29-ше №-ан школын тунемшыже-влаклан Россий Федерацийын паспортшым торжественно кучыктеныт.
ДНР-ын, ЛНР-ын, Запорожский ден Херсон область-влакын Россий дене ушнымыштлан пӧлеклалтше мероприятий «Мы – граждане России!» всероссийский программе дене келшышын эртен.
Икымше тӱҥ документыштым Йошкар-Ола ден Шернур округ гыч 25 ӱдыр ден рвезе налыныт. Тунемше-влаклан паспортыштым «Боевое братство» организацийын Марий республиканский отделенийжым вуйлатыше Владимир Белоусов кучыктен.
Тыгак вашлиймаш мучаште кажныжлан Россий Федерацийын Конституцийжым да паспортлан «Икымше-влакын толкынышт» символикан обложкым пӧлекленыт.
Ушештарена: рӱдоласе 29-ше №-ан школ Российын Геройжо Дамир Шаймардановын лӱмжым нумалеш.
Любовь Камалетдинова
