Марий Эл вуйлатыше Юрий Зайцев Йошкар-Олалан 440 ий темме вашеш рӱдоланам тӱзатыме шотышто икмыняр пунчалым луктын.
Изи Какшан сер йӧршын вес сыным налшаш. Набережны йым 10-15 ий ончычак ыштыме, верын-верын шаланенат шуктен. Парапетым тӧрлаташ, кӱртньӧ пече-авыртышым чиялташ, каткалалтше тротуар плиткылам вашталташ тӱҥалыт, моло олмыктымо пашам шуктат. Но эн кугу вашталтышыже – кӱвар-шамычым да эҥер йыр улшо зданийлам, архитектурыштлан келшышын, волгалтараш тӱҥалыт.
«Проект почеш, эҥер сер велыштыла шогышо тул меҥгылашке ГОБО проекторым вераҥдаш палемдыме. Тыге оралтын пырдыжышкыже тӱрлӧ сӱретым кусараш лиеш. Кугыжаныш мероприятий годым кум тӱсан лойгалтше флагым ужын кертына, але калыкле пайрем-влакым эртарыме годым эҥер серыште, мутлан, марий тамга сӱретлалтеш», – палемден мэр Е.Маслов.
Л.СЕМЕНОВА
Фотом Йошкар-Ола администрацийын официальный сайтше гыч налме
