«Чолга, пашаче да техникылан шӱман»
Советский район Вечын селасе Аграрно-строительный техникумышто икымше гана ончыкылык тракторист-машинист-влакын республик кӱкшытан профессионал мастарлык конкурсышт лийын.
Тушто Марий Элын кыдалаш профессионал образованийым пуышо ныл тунемме вер гыч 5 студент таҥасен. Участник шуко лийын огыл гынат, таҥасымаш шӱлыш конкурсын чыла йыжыҥыштыже озаланен: заданийым шуктышо-влак тургыжланеныт да моткочак тыршеныт. А заданий-шамыч куштылгыжак улыт манын каласаш огеш лий.
Теорий дене кылдалтше йыжыҥыште кажне участник тестым эртен: 36 йодышлан вашешташ кӱлын.
Тидын деч вара таҥасымашын практике ужашыже тӱҥалын: кажныже трактородромышто МТЗ-1221 тракторым вӱдымӧ мастарлыкым ончыктен, мастерскойышто заданийым шуктен.
«Тракторым вӱдымӧ мастарлыкым ончыктен» манаш гына куштылго – чылаже шым упражненийым чын ышташ кӱлын. Тиде двигательым пашаш колтымаш, палемдыме линий тураште писын кудалмаш да чарнен шогалмаш, «стоп» линий марте кугурак передачыш куснаш да писын кудалмаш да молат.
Практике ужашыштат ончыкылык пашаште кӱлешан ныл заданий лийын. Мутлан, тракторын «коленчатый вал» манме шапаш ужашыжым висымаш, деталь-влакым кидшӱм дене палымаш да молат.
Конкурсант-влакын заданийыштым шуктымыштым зависимый огыл эксперт комиссий аклен. Тушто Марий Эл Гостехнадзорын, Советский район администрацийын, «Профессионалитет» проектын «Агротехник» тунемме-производство рӱдерын (кластерын) предприятий-партнёржо-влакын да Квалификацийым вияҥдыме шотышто регионысо методике рӱдерын еҥышт лийыныт.
Таҥасымаште сеҥыше-влакын лӱмышт:
1-ше вер – Глеб Чезганов (Вечын селасе Аграрно-строительный техникум):
2-шо вер – Артём Туаури (ПГТУ-н Йошкар-Оласе аграрный колледжше);
3-шо вер – Рустам Самигуллин (Морко посёлкысо Аграрно-технологический техникум).
Сеҥыше Глеб Чезганов шотышто Аграрно-строительный техникумын директоржын производство тунеммаш шотышто алмаштышыже Светлана Барабанщикова тыге палемден:
– Глеб кокымшо курсышто тунемеш. Моткочак чолга, техникылан шӱман рвезе. Тунемеш, пашам ышта, тыгак ешартыш специальностьым налаш ямдылалтеш. Ме тудын дене моткоч кугешнена!
Сеҥыше ден призёр-влакым, тыгак нунын уста наставникыштым Марий Эл Образований да науко министерствын дипломжо, Квалификацийым вияҥдыме шотышто регионысо методике рӱдерын сертификатшым кучыктеныт.
Г.Кожевникова
Фотом Аграрно-строительный техникумын соцкылысе лаштыкше гыч налме
