Марий Элыште «Шӧртньӧ Витязь» православий кинон тӱнямбал форумжын йӱксавышыже» фестиваль годым С.Г.Чавайн лӱмеш калыкле книгагудышто 25 февральыште Россий Федерацийын калык артистше, РФ Кугыжаныш Думын депутатше Николай Бурляев дене усталык вашлиймаш эртыш.
Поснак палемдаш кӱлеш: тыгай лӱман форумым Николай Петрович 1992 ийыште шке тӱҥалын да теве ынде 30 ий утла вораҥдарен шога. Вашлиймаш годым каласыш: «Форумлан могай лӱмым пуаш – шуко шонышым. Икана омыштем ожнысо руш витязь кончыш. Пуйто Юмо лӱмынак тудым колтен. «Шӧртньӧ» мутшат вара шкежак тольо…»
Артистын усталык пашажым палыше да аклыше-влак книгагудын конференц-залышкыже шыҥ-шыҥ погыненыт ыле. Лӱмлӧ еҥ нунылан тӱҥ шотышто шкенжын киносо «ачаже», режиссёр Андрей Тарковский, тудын фильмлаштыже модмыж нерген каласкалыш. Тидын годым артистын кажне шомакыштыже манме гай Тарковскийым моткоч кугун пагалымыже, тудлан ӱмыр мучкыжо вуйым савен, тауштен илымыже йоҥгалте. Пытартышлан книгагудын унаже Тарковский нергенак шкенжын ямдылыме «Боже! Чувствую приближение Твоё…» документан фильмым ончыктыш.
Геннадий Сабанцев.
Михаил Скобелевын фотожо
