Таче Марий Эл Кугыжаныш Погын председательын икымше алмаштышыже Лариса Яковлева Волжский муниципал районысо депутат-влак погынын черетдыме сессийыштыже участвоватлен.
Заседанийыште районыш пурышо чыла илемым ик муниципал образованийыш ушымо да тудлан «Марий Эл Республикын Волжский муниципал округшо» лӱмым пуымо йодышым онченыт.
Тылеч ончыч Юлсер кундемысе чыла илемыште тиде йодыш шотышто публичный колыштмаш-шамыч эртеныт, тыгодым Приволжский ола шотан илемысе калык гына тудын дене келшыдымыжым ончыктен.
Эртаралтше чыла публичный колыштмашым иктешлыме почеш, депутат-влак кундемысе калыкын Волжский муниципал районым муниципал округыш савырыме дене келшымыже да законын проектшым Кугыжаныш Погыныш ончаш пуымо нерген пунчалым луктыныт.
– Тудым ынде законодательный кӱкшытыштӧ пеҥгыдемдаш кӱлеш, – палемден Лариса Яковлева да муниципал районым муниципал округыш савырыме дене икмыняр пайдам налме нерген ойлен: икымше – илем администраций-влакын чотышт иземеш, виктемын системыштыже уто бюрократий кораҥдалтеш, ик администрацийлан чыла гаяк полномочийым пуымо дене вуйлатышын районышто илыше калык ончылно ответственностьшо кугемеш, кугурак проект-влакым илышыш пурташ куштылгырак лиеш; кокымшо – илем администраций-шамычым иктыш ушымо дене бюджет аныклалтеш, анык окса инфраструктурым уэмдаш, кумдыклам тӱзаташ кучылталташ тӱҥалеш.
Волжский муниципал районысо депутат-влак погынын таче лукмо пунчалжым законодательный кӱкшытыштӧ пеҥгыдемдыме деч вара чыла илемлан ик семын вияҥаш да социальный услуго-влак дене пайдаланаш йӧн лиеш.
Маргарита ИВАНОВА
Волжский муниципал районысо депутат-влак погынын фотожо
