Марий Элыште у коронавирус инфекцийым чытен лекше пациент-шамычлан келгемдыме диспансеризаийым умбакыже эртарат. Тиде мероприятийын тӱҥ шонымашыже шӱм-вӱргорно, шӱлымӧ, эндокринный да малыме (свёртывающий) системе-влак дене кылдалтше тӱрлӧ ситыдымашым вияҥаш тӱҥалме йыжыҥыштак рашемдыме да жапым шуйкалыде эмлаш тӱҥалме дене кылдалтын.
Тений 60136 еҥын тазалыкшым тергаш палемдыме. Январь-апрельыште келгемдыме диспансеризацийын икымше йыжыҥжым 25281 пациент эртен. Ты чот гыч 64,8 процент еҥже ӱдырамаш-шамыч улыт.
Кок але тылечат шуко хронический черан пациент-влаклан поснак кугу тӱткыш ойыралтеш. Тыгай радамыш кызытеш 7511 пациентым пуртымо, тидыже келгемдыме диспансеризацийым эртыше-влакын кумшо ужашышт лиеш.
5478 еҥ келгемдыме диспансеризацийым шке кумылын эртен.
Диспансеризацийын кокымшо йыжыҥышкыже икымше йыжыҥым иктешлыме почеш 505 пациентым колтымо.
Келгемдыме диспансеризацийым эртарыме ныл тылзе жапыште 902 еҥын инфекциян огыл хронический черан улмыжым рашемдыме – тыгай кугу чот эше лийын огыл. Мут толмашеш, ӱмаште тыгаяк жаплан 443 случайым гына пеҥгыдемдыме. 584 пациентым диспансер учётыш налме.
Черланымым икымше гана рашемдыме структурышто тӱҥ ужашым, 43,6 процентым, вӱрым коштыктымо системын черже-влак налыт.
Келгемдыме диспансеризацийын результатшылан тазалыкын группыжым рашемдыме йыжыҥ шотлалтеш. 1490 еҥлан (5,9%) тазалыкын икымше группыжым (таза) пуымо, 2696 пациентлан (10,7%) – тазалыкын кокымшо группыжым (функциональный ситыдымаш-шамыч улыт), 21095 гражданлан (83,4%) – тазалыкын кумшо группыжым (хронический чер-влак улыт).
М.ИВАНОВА
Фотом интернет гыч налме
