28-30 июньышто Владимир областьысе Суздаль олаште Российысе национальный театрын-влакын II конгрессышт эртен.
Тушко Марий национальный драме театрын тӱҥ режиссёржо Роман Алексеев миен коштын.
–Кокымшо гана эртаралтше конгрессыш Российын ятыр регионжо гыч театр вуйлатыше-влак погыненыт. Тушто у проект-влакым илышыш шыҥдарыме, национальный театр-влак пашам пырля ыштыме, шочмо йылмым арален кодымо нерген мутланенна. Пример шотеш кок ий ончыч Александринский, Альметьевский театр-влак дене пырля «Шекспир. Сонеты» онлайн-спектакльым ямдылыме нерген ойленам. Мо оҥайже, тиде проектым ик кечыште пеш шукын онченыт, вет тыгай йӧнат ончышо-влакым театр искусствылан шӱмаҥдаш полша, – палдарыш Роман Юрьевич. – Театрыште у йӧным кучылтын пашам виктарен колтымо нерген каҥашыме, театр вуйлатыше-влак шке пашашт дене палдареныт, национальный театр-влаклан «Майатул», Федерация», «Туганлык» да моло фестиваль эртаралтме нергенат ушештарен кодымо. Александринский театрын директоржо Сергей Емельянов ден ты театрынак художественный вуйлатышыже Валерий Фокин Национальный театр-влакын ассоциацийыштын туныктымо шотан проектше (Национальный театральный школ) дене кумдан палдарышт. Ты школ 25 регионышто эртен. Тидымат ассоциацийын кугу сеҥымашыжлан шотлаш лиеш.
Конгресс жапыште Национальный театр-влакын кеҥежымсе икымше фестивальышт эртен. Тушто Александринский да тыгак Мордва ден Чуваш национальный театр-влак Пу зодчество тоштерыште спектакльыштым шке йылмышт дене модын ончыктеныт.
– Вес кечынже Александринский театр Суздальысе Кремльыште «Блаженная Ксения. История любви» постановкым ончыктен, – ешарыш Р.Алексеев. – Тыгай вашлиймаш театр-влакым тургыжландарыше тӱрлӧ йодышым каҥашаш да икте-весын пашаж нерген кумданрак пален налаш йӧным пуа.
А.БАЙКОВА
Фотом Р.Алексеевын альбомжо гыч налме
