(«Сурт-пече» газетын 5-ше №-=ан газетыштыже лудаш темлена.)
Йодында? Вашештена.
Йодыш-шамычлан опытан пакчазе, Елена Коренева вашешта.
Кок тӱрлӧ тӱшкаш пурышо кугымӧрым, мутлан, тыглай ден ремонтантный сортым, ик йыраҥышкак шындаш лиеш мо? Але содыки кажныжым посна йыраҥыш шындаш?
А.Бочкарева.
Марий Турек район.
Пакчаште кушшо тыглай сорт снегым, кугымӧрым лиеш веле огыл, йыгыре шындаш кӱлеш маныт. Йошкарге ден ошалге кугымӧрымат ик йыраҥеш лӱдде вераҥдаш лиеш. Икте-весыштым вашла шыркаҥдымышт дене саскан тӱсшат, тамжат ок вашталт.
А ремонтантныйым тыглай сорт дене ик йыраҥыш шындаш огеш темлалт. Молан манаш гын ончен куштымо да кушкыллан ешартыш кочкышым пуымо жап нунын йӧршын вестӱрлӧ. Кажне сортым ончен кушташ веле огыл, агротехнике могырым тӱрлӧ обработкым ышташ да саскам погаш йӧнан лийже манын, вес кумдыкыш шындаш гын, сайрак.
Нӧшмӧ молан ыш нерешт?
Южгунам чыла чын ыштет, нӧшмат сай гай чучеш, но тудо ала-молан ок нерешт. Можо келшен толын огыл, могай амаллан кӧра тыге лиеш?
Т.Осипова.
Волжский район.
Шукертак ӱдымӧ нӧшмӧ кужун ок нерешталт гын, тидлан раш шымлен лекшаш тӱрлӧ амал лийын кертеш.
- Начар структуран мланде. Пакчасаска нӧшмым ӱдаш, поснак тыгыдым, «росоталан» манын возыман тергыме производитель-влакын варыме рокшым гына налман. Тыгай мландын структуржо куштылго, комыля да моклака деч посна. Вӱдым шавымеке, ӱмбалже лончалтын ок пеҥгыдем. Нӧшмылан шытен лекташ чаракым ок ыште.
- Пайдаланыме срокшо лекше. Ужалыше-влак южгунам начар качестван да срок лекше нӧшмымат тушкалтен кертыт. А нӧшмӧ чаплын шытен лекше куатан улмым, жап дене келшен толшын фасоватлымым але укем вошт койдымо пакет кӧргыштӧ ужалалтшыште вик рашемден шукташ ок лий.
- Ӱдымӧ годым утыжым келгыш шавыме нӧшмат шукыж годым кужу жап шытен лектын ок керт. Тыгеже нӧшмым ӱдымӧ деч вара йыраҥыш вигак вӱдым шавымеке лиеш. Тудо келгыш ынже уралт манын, мландым ӱдымӧ деч вара огыл, а тылеч ончыч сайынак нӧрташ кӱлеш.
- Нӧшмӧ тӱнчыген. Мланде утыжымат вӱдыжгӧ але ночко гын, юж нӧшмӧ дек пурен ок керт. Тыге тудо нерешт лекме олмеш шопен шӱяш тӱҥалеш. Юж мландыш келгыш пурен кертше манын, дренаж нерген мондыман огыл.
Р.Чепакова ямдылен.
М.Скобелевын фотожо
