Ончер
Михаил Скобелев
Рӱдола дене кумло ий палдара
30 сентябрьыште Йошкар-Ола историй тоштерыште «Один миг – 30 лет музейных находок» лӱман ончер почылтын. Тудо тоштерын 30 ияш лӱмгечыжлан пӧлеклалтын.
Музейым 1996 ий 30 сентябрьыште почмо. Тудо олан исторический ужашыштыже – ужалкалыше, чодыра промышленник Трофим Чулковын пӧртыштыжӧ – верланен. Кызыт тоштерыште 25 тӱжем утла экспонат шотлалтеш.
28 сентябрьыште Йошкар-Оласе Россий Армийын тӱвыра полатыштыже тоштерын 30 ияш лӱмгечыжлан пӧлеклалтше мероприятий эртен. Музейын пашаеҥже-влакым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов саламлен. Пайрем мерприятийыш Марий Эл Кугыжаныш Погын председатель Михаил Васютинат ушнен. Тудо тоштерым негызлымаште шогышо-влакым шарналтен да кучем органын наградыже-влакым кучыктен.
Тоштерыште эртыше мероприятийышкат ятыр уна погынен. Йошкар-Олан ончычсо мэрже Вениамин Козлов тоштерлан оралтым кычалме нерген каласкален. Тудын мутшо почеш, кодшо курымын 90-ше ийлаштыже окса чӱдылыклан кӧра неле лийын гынат, тошто оралтым сайын олмыктеныт, коммуникацийым пуртеныт.
Саламлымашке Марий Эл Кугыжаныш Погынын ончычсо председательже Анатолий Смирнов ушнен. Тудо тоштерлан «Марийская АССР за 40 лет Советской власти» фотоальбомым пӧлеклен.
Тоштер коллекций шукерте огыл у экспонат-влак дене пойдаралтын. Марий Элын ончычсо спорт министрже Владимир Чумаковын ешыже «Сочи – 2014» олимпиаде тул эстафетын факелжым да Владимир Михайловичын телефонжым пуэн.
Йошкар-Олан историйже дене кылдалтше тӱҥ экспозиций кокымшо пачашыште верланен. Тыште кугыжа Фёдор Иоанновичын Царевококшайскым негызлыме нерген документ-влак аралалтыт, экспозиций Георгий Тайгильдинын «Основание Царевококшайска» радынаж дене почылтеш.
Михаил Скобелевын фотожо.




