Шукерте огыл «Марий чодра» национальный паркыш Российысе «Культура» телеканалын «Искатели» программыжын пашаеҥже-влак толын каеныт.
Съемочный тӱшка, программын вӱдышыжӧ да актёр Сергей Белов дене пырля Пугачёвын тумыж дене, Конан-Ерыште лийыныт. Войзымо историйышт 400 утла ияш чапланыше тумо дене тунаре кылдалтын огыл, кунар 1774 ийыште тыште лийше событий-влакым авалта. Тунам Озаҥ олам налын кертдыме деч вара Емельян Пугачёвын отрядше тошто Озаҥ тракт дене ты кундемыш чакнен толын. Пленный-влакын ойлымышт почеш, тудо чынжымак Ваштар курыкышто лийын, йӱдым эртарен. Тышечынак легенде каен, пуйто Пугачёв тушко кӱзен, йырым-йырысе кундемым ончен, умбакыже куш кайышашым рашемден. А эрдене,Юлын вес серышкыже куснаш манын, отряд Кокшайск велке тарванен.
«Искатели» программын пашаеҥже-влак утларакше Емельян Пугачёвын ты кундемыште шылтен кодымо поянлыкше нерген йодышым рашемдаш тыршеныт. Легенде почеш Пугачёв пырля шуко шӧртньым, шергакан сӧрастарышым, янлык коваштым, оксам наҥгаен. Кунам отряд Конан-Ер велке савырнен шуктен, саде поянлыкан орва имньыге ерыш порволен. Пугачёвын полышкалышыже-влак кладым лукташ толашеныт, но пундашдыме вӱд тудым пуэн огыл.
А вес легенде почеш, верысе-влак шкештак толымо поянлыкшым тумо воктеке уреныт да карген коденыт: кӧ тудым налаш тоштеш, тудо илыш дене чеверласа.
Йомдарыме казна нерген мистический историй телевизионщик-влаклан келшен. Материалым войзымо пашашке республикысе краевед-эксперт ден шанчызе-влакым ӱжыныт. Нуно ты историй дене кылдалтше тат-влакым рашемдаш полшеныт. Ты пашаш «Марий чодра» национальный паркын экопросвещений, рекреаций да шанче паша пӧлкам вуйлатыше Владлен Тойшев, ялозанлык науко кандидат Анна Крылова, республикысе Руш географический обществын председательже, Юлтех университетын доцентше Евгений Гончаров ушненыт. Нунын полшымыштлан кӧра съемочный группо верысе преданий-влак дене палыме лийын, историй факт-шамычым шонен лукмо йомакла деч ойырен кертын.
Паркын администрацийже Марий Элын ик эн сӧрал да ойыртемалтше пӱртӱс кумдыкшо нерген утларак калыкым палдараш полшымылан эксперт-шамычлан таушта.
Лишыл жапыште «Искатели» программын у выпускыштыжо телевизорым ончышо-влак «Марий чодра» кумдыкын кумылым савырыше верлажым ужын да тудын дене кылдалтше историйым пален налыт. А йомшо поянлыкшым ты кундемыште кычалаш кумылан-влак тачат улыт.
Снимкыште: Конан-Ер воктене.
Материалым «Марий чодра» национальный паркын пресс-службыжын уверже негызеш Светлана Носова ямдылен.
Паркын пресс- службыж гыч налме фото.
