Роспотребнадзорын Марий Элысе виктемжын увертарымыж почеш, 10 апрельыште республикыштына тений пудий пурымо икымше кум случайым регистрироватлыме.
Тазалыклан зияным ыштен кертше копшаҥге Волжский да Килемар районлаште илыше кок кугыеҥын да ик йочан капкылышкышт пурен. Вирусологический лабораторийын шымлымашыже рашемден: чыла пудий инфекцийдыме лийын.
10 апрель марте регионыштына пудий энцефалит деч 613 еҥ прививкым ыштыктен. Вакцинацийым кумылан кажне еҥ илыме верысе поликлиникыштыже эртен кертеш, но тидым копшаҥге лийын кертме верыш лекме деч кок арня ончыч ышташ кӱлеш.
Могыр гыч лукмо пудийым Марий Элын Гигиене да эпидемиологий рӱдерыштыже тергат. Лабораторий каныш да пайрем кече деч посна пашам ышта.
М.ИВАНОВА
Фотом интернет гыч налме
