Студотряд
«Прометей» – кеҥеж десант
«Рӱдӧ да Юл кундем Россетьын» марий филиалыштыже «Прометей» студотряд пашам тӱҥалын. Студент-влак сезон мучко Семёновко РЭС-ын объектлаштыже опытан наставник-влакын вуйлатымышт почеш энергетик профессийыш шыҥат.
Ты жапыште республикысе вич тунемме заведенийын – Марий кугыжаныш университетын, Юл кундем кугыжаныш технологий университетын, Йошкар-Оласе технологий колледжын, Марий радиомеханический техникумын да Марий политехнический техникумын – электроэнергетике профиль дене студентышт профессионал опытым налыт.
Кеҥежымсе паша десант ончыкылык энергетик-влаклан теорий шинчымашым паша дене пеҥгыдемдаш веле огыл, тыгак ойырен налме специальность нерген утларак келгын пален налаш полша.
«Мариэнерго» филиалын директоржо Сергей Хлусов студент-влаклан ойырен налме профессийыште шке вийым тергаш, паша опытым погаш, мо кертмым ончыкташ, ваш-ваш полшаш да ӱшанле йолташым муаш тыланен. Сергей Владимирович отрядын командиржылан «Мариэнерго» филиалын объектлашкыже паша путёвкым кучыктен да студент-влаклан специальностьым налме деч вара регионысо тӱҥ электросеть компанийыш пашаш толаш ӱжын.
Кӱшыл да кыдалаш профессионал образований учреждений-влакын 500 утла студентышт паша путёвкым налыныт. У сменым почмо лӱмеш торжественный линейке-влак «Рӱдӧ Россеть» ден «Рӱдӧ да Юл кундем Россетьын» чыла 20 филиалыштышт эртеныт. Кеҥеж сезонын программыже поян, тушко паша веле огыл, канышат пура: энергообъектлашке да регионысо энергосистеме тоштерлашке экскурсий, шарнымашан да сӧрал верла дене палыме лиймаш, конкурс ден спорт таҥасымаш-влак вучат. Паша семестр мучаште конкурс шот дене эн сай отрядлам ойырат. Нуно шыжым «Россеть» группысо энергетике отряд-влакын Россий кӱкшытан слётышкышт погынат.
Снимкыште: студент отряд – Марий кугыжаныш университетыште.
Юрий Исаков ямдылен.
Фотом «Мариэнергон» пресс-службыж деч налме.
