Каныш кечылаште Йошкар-Олаште «Всё для Победы! МарГУ:связь поколений» тӱнямбал форум эртен.
Тудо Украиным фашист захватчик-влак деч утарымылан 80 ий теммылан пӧлеклалтын да учёный, кугыжаныш служащий, тоштер пашаеҥ, образований да тӱвыра учрежденийлаште ыштыше, журналист, студент, поисковый пашашке ушнышо, мер толкын еҥ-влакым чумырен. Мероприятийыш Россий Кугыжаныш Думын депутатше Елена Цунаева толын.
Ты форум Россий Президентын кӱштымыжӧ почеш «Без срока давности» шанче-просветительский проект кышкарыште эртаралтын. Тӱҥ шонымашыже – элнан историйыштыже лийше событий-влакым шойыштын умылтараш тыршымаш ваштареш виктаралтше йодыш-влакым каҥашаш да самырык-влакым шочмо элым йӧратыме шӱлышеш шуарыме пашалан у шӱкалтышым ышташ. СВО кайыме пагытыште образований сферыште ыштыше-влак самырык-шамычлан сай шинчымашым пуышаш улыт. Учёныйын карьерыже – самырык еҥлан кушкаш ик эн сай корно, лач нуно элнан лӱдыкшыдымылыкшылан пашам ыштат. Кугыжанышлан пашазе специалист влакат кӱлыт, а тидлан вузлаште школ туныктышо, тыгак профессионал технический образований специалист-влакым сайын ямдылыман.
Президентын палемдыме цель-влакым самырык тукымым ушан-шотаным ончен куштымо, шуарыме деч посна шукташ ок лий. Вет лач тудо элнан экономикыжым вияҥдаш, тудын эрыкан лиймыже, волгыдо ончыкылыкшо верч кучедалаш тӱҥалеш. Санденак школышто тунемше да студент-влаклан шинчымашым налаш, кӱлеш семын шуаралташ чыла условийым ыштыман.
Регион вуйлатышын лӱмжӧ дене погынышо-влакым республикысе правительстве председательын икымше алмаштышыже Михаил Васютин саламлен. Серышыште возалтын: «Патриотизм – шочмо мландым, шке элым йӧратыме деч кугурак шижмаш. Тиде – Российым шке шочмо эллан шотлышо айдемын чон кӧргысӧ позицийже. Идеологий фронтышто мемнан эл ынде ятыр ий нацизм дене кучедалеш веле огыл, Украиныште СВО ты амал денак эртаралтеш. Российым ӧрдыж гыч темдаш тӧчат гын, тудо тӱнямбал историйыш садак вашталтышым пурта. Кугу Отечественный сарыште сеҥымаш Российыште илыше кажне гражданинлан негыз семын кодеш. Ме совет салтак-шамычын геройла кредалмышт да сеҥымашышт дене кугешнена, нуным эре шарнаш тӱҥалына».
Марий кугыжаныш университет ынде 90 ий утла регионлан туныктышо кадрым тапта. Лач школ туныктышо-влак самырык-шамычын ушышкышт историй предмет гоч чын умылымашым пыштат, элнан чын патриотшо семын кушкаш кӱлеш корным ончыктат.
Кеч кок кечаш форумын мероприятийже-влак университетыште веле огыл, тыгак Калык-влак келшымаш пӧртыштат эртеныт. «Память. Мужество. Доблесть.» конференций, «Наставничество&поиск» кычалше отряд-влакын регион-влак кӱкшытан кокымшо слётышт, «Без срока давности» баннер да моло ончер эртеныт. Участник-влакым тӱрлӧ мастар-класс, «йодыш-вашмут» интеллектуал модыш, СВО участник дене вашлиймаш, пожарно-прикладной эстафете да моло оҥай мероприятий вученыт. Икымше кечын докладчик-влак коклаште Белгородысо кугыжаныш национальный шымлыше университет гыч тӱнямбал отношений кафедрын туныктышыжо Роман Травин лийын. Ожсыгечынже Украинысе ВСУ ты олам бомбитлен.
Слетыш гын уло Россий гыч 100 наре поисковик толын. Университетыште «Воскресение» кычалше отряд ынде 10 ий наре пашам ышта. Тудо 30 наре экспедицийым эртарен. Нунын кышкарыште 300 наре салтакын, мемнан землякна-влакын, лӱмыштым рашемденыт да кӱлеш семын угыч тоеныт. 2015 ий гыч вузышто кычалме паша тоштерымат почыныт. Сандене лийын вес кычалше-влакым мо дене палдараш.
С.Носова
Д.Речкинын/Марий Элым вуйлатышын пресс-службыжын фотожо.
