20 июнь гыч 15 август марте Российын чыла регионыштыжо «Профессионалитет» образовательный программе дене приёмный кампаний тӱҥалын. Марий Элыштына тудын почеш «Ялозанлык» направлений тунемаш налыт.
Ушештарена, «Профессионалитет» федеральный программе «колледж – паша верым пуышо» вашкылым пеҥгыдемден вияҥдаш, предприятий ден организаций-влаклан тачысе кечын йодмашыжлан келшыше специалист-шамычым ямдылаш виктаралтын. Марий Элыштына «Агротехник» тунемме-производство кластер Юл кундем кугыжаныш технологий университетын Йошкар-Оласе аграрный колледжыштыже почылтын да приёмный кампанийжым тӱҥалын.
«Профессионалитет» программе почеш тунемаш пурышо абитуриент-влакым икымше курс гычак республикнан 17 ик эн ончыл ялозанлык предприятийын пашаж дене палдараш тӱҥалыт. Тиде –«Семёновский» ден «Шойбулакский» племзавод-влак, «Победа» ден «1 Май» ялозанлык производство кооператив-влак, «Лукоз» ООО, «Искра» колхоз, кресаньык-фермер озанлык-шамыч да молат.
Тенийысе абитуриент-влаклан палемдыме предприятийла дене целевой ойпидышым ышташ йӧн пуалтеш. Тудын почеш нуно, тунем лекмекышт, вигак паша веран лийыт.
«Профессионалитет» программе почеш приёмный комиссий-влак Йошкар-Оласе аграрный колледжыште веле огыл, тыгак Марий радиомеханический, Йошкар-Оласе автодорожный, Кужэҥерысе Аграрно-строительный, Марий Турекысе Ялозанлык механизаций, Транспортно-энергетический техникумлаште почылтыныт.
Специальностьым чылаже 7 направлений дене налаш лиеш:
– автомобильым олмыктымо да обслуживатлыме шотышто мастер;
– ялозанлык производство мастер;
– агрономий;
– увер системе да программирований;
– агропромышленный комплексыште электротехнике системе;
– ялозанлык технике да оборудований дене пайдалымаш да олмыктымаш;
– автомобильын двигательжым, системыжым да агрегатше-влакым технический могырым облслуживатлымаш да олмыктымаш.
Тунемаш пураш йодмашым, документым тений 15 август марте пуаш лиеш.
Г.Кожевникова
