COVID-19

Прививке да арака

У коронавирус инфекций деч вакцинацийым профилактический прививке-влак календарьыш пуртымо.

Прививкым ыштыктыме деч ончыч калыкым шуэн огыл ик йодыш тургыжландара: вакцинаций деч ончыч да вара спиртан напиткым йӱаш лиеш мо? Тичмаш налмаште алкоголь айдемын нерве системыжым локтылеш. А тудым чӱчкыдын йӱаш гын, чыла орган ден системе орлана. Ончыкыжым мокшын циррозшо, панкреатит, пагар йора, инсульт, миокардын инфарктше, онкологий дене черланен, вӱрчуҥга погынен кертме лӱдыкшӧ кугемеш.

Алкогольым эм дене пырля йӱаш огеш лий, поснак – корштымым лыпландарыше, омым кондышо, депрессийым чактарыше, антибиотик, нейролептик шотан препарат дене. Арака эмын пайдажым иземден але кугемден, тазалыклан зияным ыштен кертеш.  

Спиртан йӱыш деч организмыште алкоголян альдегид погына, тудо иммунитетын пашажым локтылеш. Углеводын, коян да белокын алмашталтмашышт дене кылдалтше метаболический ситыдымаш палдырна. А белок антителан чоҥалтмаштыже тӱҥ материаллан шотлалтеш. Тудын ситыдымыж годым антитела шагалрак ышталтеш, вирус деч аралтыш лушкыдырак лиеш.

Вакцинаций деч вара спиртан напиткым йӱаш гын, айдемылан йӧсӧ лийын кертеш, тыгак аллергий палдырнен сеҥа.

Келшыше ошкыл – вакцинын пайдалыкшылан йӧным ышташ: сайын кочкаш, шкем кылмыме деч аралаш, утларак канаш да аракам йӱаш огыл.  

                                                                                          М.ИВАНОВА

Опубликовать в Одноклассники

Добавить комментарий