УВЕР ЙОГЫН

Марий рӱдолам чапландрат…

Йошкар-Олана сайын виянже манын, шке пашашт дене суапым ыштыше еҥ-влаклан «Почетный гражданин» чап лӱмым пуымо нерген оласе погынымашын пунчалже эше 1968 ийыштак лектын.  Тиде спискыште эн ончыч Петр Павлович Николаев шога. «Марагрострой» механизаций объединений управленийын башенный кранын слесарьже-влакын бригадирышт  Социалистический Паша Герой лӱмым сулен налын улмаш. Але марте ты спискыште 46 еҥ лийын.

Тӱрлӧ профессиян, ийготан, илыш пӱрымашан, койышан улыт гынат, нуным икте уша: шке пашаштым да олаштым чот йӧратат. Спискысе ятыр еҥжын лӱмжо палыме: СССР калык аритст, Марий АССР искусствын сулло пашаеҥже А.Я.Эшпай, М.Шкетан лӱмеш кугыжаныш национальный драме театрын артисткыже Г.Н.Ямаева, Марий Элын калык писательже-влак К.К.Васин ден В.С.Столяров (Юксерн), оласе йоча эмлымверын тӱн врачше Л.И.Соколова, историй науко доктор К.Н.Сануков да молат.

Йошкар-Олан 435 ияш лӱмгечыж вашеш тыгай чап лӱмым налше еҥ-влакым олан историй тоштерышкыже поро йӱлаш савырныше вашлиймашке ӱжыныт ыле. Шукын толыныт. Лач нунын ончылнак оланам чапландарыше  эше ик айдемылан,  Йошкар-Ола да Марий митрополит Иоаннлан, тыгай лӱмым пуышт.  

Тыгай ойыртемалтше еҥ-влакын вашлиймашышт кажне гана пеш сай кумыл дене эрта: кажныжын каласышашыже уло, икте-весыжын кумылжым нӧлталыт, эртышым шарналтат. Оласе администраций вуйлатыше-влак нунылан таушташ  да пайрем дене саламлаш лӱмын толыт. Тений гын чапым налше уна-влак тоштерын олан кечыжлан ямдылыме ончерже дене палыме лийын кертыныт. Тыгак Йошкар-Олан почётный гражданинже Павел Алексеевич Самсоновын шочмыжлан 110 ий теммылан пӧлеклалтше  «Архитектор» фотовыставкым онченыт.

  С.НОСОВА.

Опубликовать в Одноклассники

Добавить комментарий