29 майыште рӱдолаште верланыше «Синема Эл» кинотеатрыште (Йыван Кырля урем, 25) «Марийские сказки» киноальманахын премьерже лиеш.
Икымше гана 18 шагатат 30 минутышто, вес гана 19 шагатат 30 минутышто ончыктат. Регионысо кинематографист-влакын войзымо тичмаш метражан тиде фильм шукерте огыл РФ Тӱвыра министерствыжын прокатлан удостоверенийжым налын.
Режиссёр Денис Шаблийын шке воткыл лаштыкыштыже серымыж почеш, фильмым ончыктымашке тушто модшо лӱмлӧ артист-влак толшаш улыт. Кӧжым тудо рашемден огыл, сюрприз лиеш манын палемден. Премьер годым музыкальный номер, съемко площадке гыч реквизит-влакым ончыктат. Артист-влак дене войзалаташ, мутым вашталташ лиеш.
Фильмын сюжетше тыгайрак. Школыш у туныктышо толын. Урокын темыже олмеш тудо тунемше-влалан кум историйым каласкала. Тиде марий талешке-влак Онар, Ирга да Чоткар нерген кызытсе жаплан келшые историй-влак лийыт.
30 май гыч фильмым «Синема Эл», «Октябрь» да республикын районласе кинотеатрлаште ончыкташ тӱҥалыт. Тушко Пушкин карт полшымо денат логалаш лиеш.
Снимкыште: «Марийские сказки» фильмлан постер.
Денис Шаблийын воткыл лаштыкше гыч налме.
