Волжский район гыч самодеятельный композитор да мурызо Вячеслав Осипов шке усталыкше дене палдараш пытартыш жапыште кок гана Пошкырт кундемыш гастроль дене миен коштын да Калтаса ден Мишкан районласе клуб ден школлаште концертым ончыктен.
Тыште тудлан Татарстан Республикысе тӱвыран сулло пашаеҥже Инна Килеева полшен. Шке жапыштыже тудо Менделеевск олаште марий да руш калык муро «Эрвел» ден «Былина» ансамбль-влакым чумырен. А сулен налме канышыш лекмыж деч ончыч Набережные Челны олаште ветеран хорым вуйлатен, вара Шернур посёлкысо тӱвыра пӧртыштӧ ыштен. Инна Килеева кызыт Йошкар-Олаште ила.
Вячеслав Оспиповым мемнан республикыште шукынжо палат. Рвезе музыкальный шинчымашым налын. Вара Волжский районысо школлаште музыклан туныктен. Марий кугыжаныш университетын тӱвыра да сымыктыш факультетыштыже этнокультурологлан тунем лектын. Икмыняр ансамбльым чумырен, санденжат репертуарым пойдараш манынак шкак семым возаш тӱҥалын. Тудо – 500 наре мурын авторжо, фонограмман 10 мультимедийынй сборникым ямдылен. Тудын кажне мурыжо ойыртемалтше, чоным тарватыше. Ик мурыштыжо «Илет – вурсат, колет – моктат» манмыжак мом шога!
Творческий вашлиймашлаште кок самодеятельный артист шке илыш да творческий корнышт дене палдареныт, усталыкыштым ончыктеныт. «Инна дене мыйым пӱрымаш ваш ыштен», – каласыш телефон дене мутланыме годым Вячеслав.
Кажне вашлиймаш деч вара мураш туныктымо мастар-класс-влак эртеныт. Вячеслав ден Инна икмыняр мурым пырлят йоҥгалтареныт. Мурын шомакше-влак экраныште возалтыныт, сандене касыш толшо-влак артист-шамыч дене пырля мурен кертыныт. А вара чылан пырля «кандырам» пунен куштеныт да шарнымашым кодаш манын, фотом ыштеныт.
Вячеслав Осиповын ойлымыж почеш, пошкырт марий-влак деке унала мийыме кажне гастрольжо вич кече шуйнен. Кок районыштыжат нуным тусо поро чонан марий-влак шокшын вашлийыныт, малаш пуртеныт, унала коштыктеныт. Мутлан, артист Калтаса районышто Азимбаш ял гыч Мария ден Евгений Шайдулинмытым палемдыш. Мария Ивановна шкеже Морко район Кугу Шале гыч, пелашыже агрономлан ышта. Тудо шке машинаж дене клуб ден школ еда коштыктен. Мишкан районыштат поро еҥ-влак вашлиялтыныт: Кульчубай ял гыч мурызо Арсений Андреев, Ирсай ял гыч журналист Эсен Элай, Арзамат ял шотан илем вуйлатыше Станислав Саликов. Вячеслав Осипов чыланыштлан таушта.
Снимкыште: Калтаса район Павасолаште вашлиймаш годым.
Фотом В.Осиповын еш альбомжо гыч налме.
