Марий Элыште «Шарнымаш Книга» увер порталын презентацийже лийын.
Мероприятий республикын «Герои Отечества» тоштер-патриотике рӱдерыштыже эртен. Тушто регионым вуйлатыше Юрий Зайцев лийын.
«Шарнымаш Книга» увер портал – цифран у ресурс – кучем, архив, тоштер, книгагудо, школ пашаеҥ-влакын, тыгак краевед, историк-шамычын пырля ыштыме кугу пашаштын лектышыже. Тушто Кугу Отечественный сарыште лийше-влак илыш корнышт, нунын шарнымашыштым, фотографийыштым, награде документыштым погымо.
Юрий Зайцев проектым илышыш пуртымаште тыршыше-влаклан тауштен каласен: «Тиде кӱлешан пашаш – аклаш лийдыме документым погымо гыч технический сомыл марте – надырым пыштыше чыла еҥлан тау. Кеч-мыняр ий эртыже, тыгай савыктышлан кӧра ме Кугу Отечественный сарыште тӱням фашизм деч утарыше герой-влак нерген шарнымашым арален кодена. Мемнан порыс – Сеҥымаш верч кредалше-влакым шарнен илаш. «Шарнымаш Книга» – архив гына огыл, а илыше проект, кушто кажныже шке ешыжын историйже дене палдарен кертеш».
Марий Эл вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
