Марий Элыште мӱшкыран студент-влаклан 100 тӱжем теҥгем пуат, увертара Марий Элын Паша да социальный аралтыш министерствыже.
Тунемме жапыште ава лияш ямдылалтше ӱдырамаш-шамычлан кугыжаныш деч шкешотан полышым «Еш» национальный проект ден аза шочмо чотым кугемдыме шотышто регионысо программым илышыш пуртымо кышкарыште ыштат. Оксам студенткын ӱдырамаш консультацийыште мӱшкыран улмо шотышто учётыш шогалмыж годым ик гана тӱлат.
Выплатым налше-шамыч кокла гыч иктыже – Медведево районысо Шойбулак селаште илыше Дарья Сергеева.
22 ияш ӱдырамаш пелашан. Ончыкылык ава да специалист Юл кундем кугыжаныш технологический университетыште «Молодёжь дене пашам ыштымаш» направлений дене 2-шо курсышто тунемеш.
Дарья мӱшкыран улмо да азам ыштыме шотышто учётыш мартыште шогалын. Кугыжанышын йочам вучышо студент-шамычлан окса дене полшымыжым пален налмекыже, Медведево районышто социальный полышын мерыже-влакым ыштыме рӱдерыш каен. Специалист-влак тудлан йодмаш дене пырля келшыше документым кондаш каласеныт.
Ӱдырын йодмашыжым майыште онченыт да тунемше ончыкылык авалан 100 тӱжем теҥгем тӱлаш пунчалыныт.
«Тыгай полышлан моткоч куаненам! – тауштымо семын манеш Дарья. – Кызыт кугыжанышнан да кучемнан еш-влак нерген шонымышт, нунын сай илышышт верч тыршымышт, мыланна, самырык ава-шамычлан, полшымышт чынжымак шижалтеш».
Выплатылан йодмашым пуаш лиеш:
- республик кумдыкышто верланыше шуко функциян рӱдерыште (МФЦ);
- илыме кундемыште социальный полышын мерыже-влакым ыштыме рӱдерыште.
Маргарита ИВАНОВА.
