24 февральыште Самырык-влак полатыште ДНР ден ЛНР гыч беженец-влаклан гуманитарий полышым погышо пункт почылтын. Тудо шочмо гыч шуматкече марте 8:30-18:00 шагат жапыште пашам ышташ тӱҥалеш. Акцийым «Красный крест» Россий мер организацийын регионысо пӧлкаже эртара.
Неле ситуацийыш логалше-влаклан кузе полшымаш нерген увер дене ВКонтакте, Телеграмм да Viber мессенджерласе «Помощь беженцам в Марий Эл» чат-бот гоч палдараш тӱҥалыт (ссылкылам «Молодёжь Марий Эл» тӱшкаште муаш лиеш). Кызытеш ятыр жап аралалт кертше кочкыш сатум (консерве, шӱраш, чай, сакыр), мушкылтмо средствам (шампунь, пӱй эрыктыме пасте, щётко), канцеляр сатум (йоча книга, раскраске), маскым, перчаткым, салфеткым, йоча ден илалше-влаклан памперсым, пелёнкым йодыт.
– Чат-ботлаште увер эре уэмалтеш. Садлан полшаш кумылан-влаклан ончыч тушко пурыман. Ме ситуацийым эскерен шогена. Иктаж уым пален налына гын, вигак тушко возена. Кызытеш йоча-влаклан полыш кӱлешлыкым ужына, – палдарыш Самырык-влакын полатыштым вуйлатышын алмаштышыже Лариса Лоскутова.
Кунам да кузе ты полыш беженец-влак деке логалеш манын йодмемлан тудо тыге вашештыш:
– Мемнан кундемышкына беженец-влак толын шуыт але – уке кызытеш каласаш йӧсӧ. Тыге лиеш гын, полыш нунын деке, мутат уке, вигак миен шуэш. Тыгак сату-влакым ме ты йодыш дене пашам ыштыше вес рӱдерлаш колтена. Нуныжо тушеч йодшо еҥ деке намиен шуктат.
Акций тӱҥалме эрденак «Марий Эл» газет лӱм дене полатыш миенна да ме, тудын фотокорреспондентше Михаил Скобелев ден журналистше Ольга Мошкина, ты поро пашаш ушненна. Аза-влаклан келшыше памперсым да икымше полыш аптечкым намиенна. Ты неле жапыште изи полышнат иктаж-кӧм куандарен сеҥа манын ӱшанена.
О.МОШКИНА
Авторын фотожо
