Россий президент В.В.Путинын темлымыж дене почмо «Сириус» тунемме рӱдерыште 2024 ий 6 гыч 26 апрель марте «Журналистике да медиа» программе илышыш шыҥдаралтеш.
Конкурс почеш 8-11 класслаште тунемше талантан, возымо пашалан шӱман ӱдыр-рвезе-влакым ойырен налыт. «Сымыктыш» направлений почеш участник-влак кызытсе медиалан текстым возаш, фото да видеоматериалым войзаш да ямдылаш, интервьюм налаш, факт-влакым кычалаш, уверлам тергаш тунемыт. Российысе телевидений редакций, информаций агентстве да соцсеть-влакын пашашт дене палыме лийыт.
Рӱдерыште налме шинчымашышт ончыкыжым наставник-влакын вуйлатымышт почеш медиапроект-влакым ышташ полша.
Яра туныктат, чыла роскотым «Талант да сеҥымаш» образовательный фонд тӱла. Конкурсыш логалаш манын, 2024 ий 17 январь марте (ты кечынат лиеш) «Сириус» рӱдерын сайтышкыже https://sochisirius.ru адрес дене йодмашым колтыман.
Л.СЕМЕНОВА
