РФ президентын Юл кундемысе федеральный округысо полномочный представитель Игорь Комаров ден Марий Эл вуйлатышын пашажым жаплан шуктышо Юрий Зайцев 30 августышто Марий Эл правительстве пӧртыштӧ вашлийыныт.
«Юрий Викторович, Россий президентын кӱштымыж почеш чодыра пожарым йӧртымӧ паша шотышто комиссийыште ыштыме годым ме вашлийынна. Палем, кугу паша ышталтын», – каласен Игорь Комаров. Юрий Зайцев республикылан кугу тӱткышым ойырымыжлан полпредлан таум ойлен да чодыра пожар кызыт могай ситуацийыште улмо нерген рашемден. Республикын социально-экономический илышыж дене класкалымыж годым тудо эн кӱлешан направленийла дене сай могырыш вашталтыш-влакым палемден.
Паша дене толын коштмо жапыште Игорь Комаров ден Юрий Зайцев рӱдолан сӧрал верлажым онченыт. Экскурсий Брюгге сер мучко эртен.
Йошкар-Олаште архитектур велым ойыртемалтше зданий-влак шуко улмылан вияҥше инфраструктурылан кӧра турист-влак шукемыт, сандене турист отрасльлан полшыман, а республикын ты шотышто ончыкылыкшо уло, палемден полпред.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
