Марий Элыште корно пашаеҥ-влак ола деч ӧрдыжсӧ кугорно воктене Сосновскийын полдыранжым пытарыме пашам шуктат.
Шуко кушмо кумдыклаште тудым солат, вара химий препаратым шават. Ты полдыран моткоч аяран улмыжым шукын палат, очыни. Токсинже логалеш гын, коваштым когарта да ты вер кужу жап ок тӧрлане. Кушкыл кеҥеж мучко шуко кичкым пуа, а тудо мландыш возеш гын, моло кушкылымат темдалеш. Сандене полдыраным экологический вредительлан шотлат.
Теве кеҥеж тӱҥалтыште Курыкмарий кундемысе ик кумдыкышто тудым пытарыме шотышто верысе калыклан Межрайонный ден Пӱртӱсым аралыме прокуратурылаш шумеш шуаш логалын: ял озанлык назначениян кумдыкышто тудо чот пошен улмаш. Калыкын йодмыжым шуктеныт, тудым пытареныт.
Росельхозцентрын Семёновкысо управленийжын специалистше-влак села кумдыкышто тыгай полдыран дене кок кужыт дене кучедалыт.
Гербицид дене обрабатыватлыме тыгай кумдыкышто кид дене нимомат тӱкаш ок темлалт. Тушто пийым, вольыкым коштыктыман огыл.
«Марийскавтодор» АО-н воткыл лаштыкше гыч налме фото.
