Кугыжаныш флагын кечыже вашеш Москосо Сеҥымаш тоштер «Россий флагын тӱсшӧ-влак» онлайн-флешмобым увертарен.
Патриот шӱлышан онлайн-мозаикым ыштымашке Марий Элыште илыше-шамычат ушнен кертыт. «Российыште илыше калыкым элнам ты куанле кече дене саламлаш ӱжына. Посна еҥ але йолташ-влак дене пырля ойыртемалтше триколорым ышташ темлена. Тек тудым кугу элыштына илыше шукырак еҥ ужеш», – ойлат тоштер пашаеҥ-влак.
Онлайн-флешмобыш ушнаш кумылан-влак 14 август марте, Россий флагын тӱсшӧ-влакым кучылтын, творческий композицийын фотосӱретшым ямдылышаш да тудым тоштерын сайтышкыже колтышаш улыт. Сӱретлаш, коллажым ышташ, вургемлан келыштараш лиеш. Пашаште модышым, книгам, шарым, пеледышым, моло арверымат кучылташ келшен толеш.
Россий флагын кечынже Сеҥымаш тоштерын сайтыштыже вара фотопашам колтышо-влакын вийышт дене ик кугу флагым келыштарат да ончыктат. Икманаш, ик кугу флагым мозаике семын чумырат.
Флешмоб эртыме жапыште эн сай паша-влакым онлайн-йӱклымаш гоч 2 сентябрь марте ойырат. Эн шуко йӱкым погышо эн сай паша-влакын озаштым шергакан пӧлек дене палемдат. Чыла участниклан сертификатым электрон почтыш колтат.
С.Носова
