Марий Эл вуйлатыше Юрий Зайцев шочмын граждан-влаклан приёмым эртарен.
Килемар район Нежнур гыч Наталья Кропинова ашнаш налме 25 йочам ончен луктын, йол ӱмбаке шогалтен, кызыт 9 йочам ончен-кушта. Тудо Юрий Зайцев деч пӧртшӧ воктене изирак спорт да модмо площадкым ышташ йодын. Шотлен лукмо почеш, тыгай площадке 120 тӱжем теҥгеш шуэш, рончыман-погыман кӱртньӧ гыч ыштыме «Угловой» спорт комплексым вераҥдаш тӱҥалына, умылтарен район администраций вуйлатыше Татьяна Обухова. «Йоча-влакын вий-куатыштым чын корно дене виктарыман, а спорт – тиде шӱм-чоным да кыпкылым шуарымаш. Площадке тыланда келша, шонем», – каласен Юрий Викторович.
Йошкар-Ола гыч самырык ава Татьяна Пушкинан оласе Петров уремыште верланыше 4-ше пӧрт тура корно шотышто йодышыжлан Марий Эл вуйлатыше вашештен: «Мыйын темлымашем почеш Йошкар-Олан мэрже Евгений Маслов дене каҥашен, кудывечыласе корным олмыктымо шотышто программым пеҥгыдемдыме. Тудо 5 ий шуйна. Тендан йодмо участкат, Татьяна Викторовна, программыш пурышаш».
Медведево район Поланур гыч Надежда Масленникова сай увер дене толын: шушаш ийыште яллан 300 ий темеш, кугу пайремым эртараш ямдылалтыт, шуко уна погынышаш. Ялыш кудал пурымо корныжо гына пеш шӱкшӱ.
Ялын 300-шо идалыкше – тушто шочшо да тушто илыше-влаклан кугу лӱмгече, сандене корным олмыктымо йодыш решатлалтшаш, каласен республик вуйлатыше. Н.Масленникова тудым ял пайремыш ӱжын.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
