Почмо омса кечын — экскурсий дене
Йошкар-Оласе 26-шо №-ан гимназийын кудымшо классше гыч кандашле утла тунемшым Почмо омса кече дене келшышын «Рӱдӧ да Юл кундем Россеть» ПАО-н «Мариэнерго» филиалышкыже экскурсий дене ӱжыныт.
Экскурсий икмыняр ужашан лийын. Ончыч тунемше-влаклан энергетик профессий да энергийым ситарыме пашам шуктышо тӱрлӧ специальностян еҥ-влак нерген каласкаленыт. Йоча-влак нунын паша кечышт да могай кӱлешан пашам шуктымышт нерген пален налыныт.
Гимназист-влакым электровий дене лӱдыкшӧ деч посна пайдаланыме правил дене палдареныт да умылтарымашан фильмым ончыктеныт. Мӧҥгысӧ электроприбор дене пайдаланыме годым ток дене эҥгекыш логалме деч шекланаш кӱлмӧ нерген ушештареныт. Тунемше-влак энергийым перегыме шотышто пайдале ой-каҥашым да тидлан мом ыштышашым пален налыныт. Энергообъектлам аралыме кумдыкышто, электроустановко лишне шкем кузе кучаш кӱлмӧ нерген нунылан каласкаленыт, икымше полышым пуымо правил дене палдареныт.
Вара гимназист-влак филиалын сетьым виктарыме рӱдерышкыже миеныт, тушто нунылан кызытсе жаплан келшыше диспетчер оборудованийым ончыктеныт, регионысо электросеть комплексым кузе виктарыме да диспетчер-влакын пашашт нерген радамленыт.
Филиалыште тыгай Почмо омса кечыже чӱчкыдынак лиеда. Тидыже йоча ден самырык-влакым энергетик профессийлан кумылаҥден кушташ полша.
Юрий ИСАКОВ
