1 февральыште Т.Евсеев лӱмеш калыкле тоштерыште «Пӧлеклыме кече» акций лиеш.
Тыгай акций кажне ийын Тимофей Евсеевич Евсеевын шочмо кечынже эртаралтеш. Тоштерлан лач тудо негызым ыштен. Санденак ты кечын кажне кумылан еҥ тушко историян арверым намиен да пӧлеклен кертеш. Тиде ӧрыктарыше фотографий, документ, книга, ӱзгар, кидпаша да тулеч моло лийын кертыт. Но кажныже Марий кундемнан, калыкнан историйже, тӱвыраже, искусствыжо, илышыже, политикыж дене палдарышаш. Тыланда кӱлдымӧ арверлан кокымшо илышым пуэн кертыда, нуно тоштер экспонатыш савырнат. А тыгай пӧлекым ыштыше кажне еҥлан тоштерыш мияш да экспозицийже-влакым ончалаш кок еҥлан ӱжмашым кучыктат.
С.НОСОВА
