УВЕР ЙОГЫН

Умбакыже тунемаш але пашаш пураш?

Марий Элын Тазалыкым аралыме министерствыжын вуйлатышыже-влак да регионысо медицине организацийлан тӱҥ врачышт Российысе медицине вузлаште визымше курсышто тунемше-влак дене вашлийыныт.

Нине ӱдыр-рвезын аккредитаций деч вара врач лийме да участкысе педиатрлан але терапевтлан, стоматологлан але эпидемиологлан пашам ышташ тӱҥалмышт марте улыжат ик ий кодын. Моло специальностьым выпускник-шамыч ординатурышто тунемме деч вара гына налын кертыт.

Тыгодымак республикын ординатурышто палемдыме наре верым налме да выпускникна-шамычын нуным тӱрлӧ мединститутышто ӱшанлын айлыме жап эртен. Ынде ординатурысо кажне верлан моло регионын еҥже-влак дене пырля ик конкурсышто «кучедалман»: вузышто налме шинчымаш огеш сите гын, келшыше специальность нерген шонкалымым чарнашат лиеш.

 – Тачысе кечын ойыртемжылан отрасльын первичный звеножым уэмдыме условийыште эн ончычак тиде звеном кадр дене пеҥгыдемдымым шотлыман – выпускник-влак кокла гыч шукынжо поликлиникылаште участкысе педиатр да терапевт лийыт, – вашлиймаште палемден тазалыкым аралыме министрын алмаштышыже Т.Бастракова.

Но тиде поликлиникылаште аҥысыр специальностян врач-влакын ситымышт нерген огеш ойло. Тӱҥ врач-влакын ойлымыштым иктешлаш гын, самырык врач-шамычлан уло могай специальностьым ойырен налаш. Республикысе медорганизацийлашке невролог, кардиолог, УЗИ врач, рентгенолог, эндокринолог, анестезиолог, онколог-влак да мойн моткоч кӱлыт. Выпускник-влак вуз деч вара вигак ординатурыш пурен огыт керт гын, участкысе врачын опытшым изишак погымо деч варат тунемын сеҥат.   

Ӱдыр-рвезе-влак ончыкыжым лачшымак могай специальностьым ойырен налмышт шотышто вашмутым Марий Элын Тазалыкым аралыме министерствышкыже март мучаш марте пуэн шуктышаш улыт. Медициныште направленийым ойырен налме шотышто тӱҥ врач-влак шуко сай каҥашым эсогыл шке паша да илыш опытышт гыч пуэныт, тылеч посна нуно медорганизацийыштышт могай кадр кӱлмӧ дене палдареныт.

Профессийыш чын ойырен налме корно «Здравоохранений» национальный проектын «Марий Эл Республикын медицине организацийлашкыже квалифицироватлыме кадрым ситарымаш» региональный проектшым илышыш пуртымашке эше ик чапле ошкыл лиеш.

М.ИВАНОВА

Фотом Марий Элын Тазалыкым

аралыме министерствыжын

фототекыж гыч налме

Опубликовать в Одноклассники

Добавить комментарий