8 июльышто пӱтынь элна Еш, йӧратымаш да икте-весылан ӱшанле улмо кечым палемдыш.
Мемнан республикыштат тиде пайрем путырак кумдан палемдалте. Тудлан пӧлеклалтше мероприятий-влак ты гана эсогыл 5 июль гычак эртаралташ тӱҥалыныт да ныл кече шуйненыт. Тиде жапыште, мутлан, Йошкар-Олаште тоштерлаште да уремлаште, тӱвыра учрежденийлаште, книгагудылаште еш-влаклан иквереш каналташ келыштарыме туныктымо да анимаций программе, концерт, йоча-шамычлан тӱрлӧ модыш, спорт таҥасымаш, акций, моло лийыныт.
Площадь гӱжлен
8 июльышто, пайрем кечын, кечывал деч вара Патриарший площадь гӱжлыш. Ондакысе семынак теният тушто кидмастар-влак шке пашаштым темленыт. Но моло ийла дене таҥастарымашт, ты гана нуно поснак шукын улыт ыле. Адакшым площадь тӱр дене йыр огыл, а ик кугу кумдыкышто икмыняр радам дене вераҥыныт.
Мастарлык класс-влакат пашам ыштеныт. Туштыжо ала-момат ышташ туныктеныт. Ик вере йоча-шамыч ача-авашт дене пырля фотографийла гыч сӱретым «чумыреныт», вес вере чурийышкышт аквагримым ыштыктеныт, кумшо вере кагаз гыч ойыртемалтше лампе-фонарьым, нылымше вере «висвис» подвескым ямдылаш туныктеныт. Тушкыжо мыят ушныде шым чыте. Пеш вашке ыштышым. Да тунамак, шӱйышкем сакен, умбакыже ошкыльым. Пайремыс! Адакшым Еш, йӧратымаш да икте-весылан ӱшанле улмо кечын символжо лачшымак – висвис пеледыш!
Ик вере поро кумылым ончыктымо «Zа Марий Эл» фондын еҥже-влак чебурашке-талисманым ышташ туныктеныт. Тудым ямдылымеке, кумылан-шамыч СВО-што улшо-влаклан серышым возеныт да, чыла тидым окоплык сорта пелен пыштен, салтак-шамычлан колташ ямдыленыт.
Но эн кугу вер молгунамсе семынак висвис гыч вуйшӱдышым ышташ туныктымо мастарлык класслан ойыралтын. Теният тушто еҥ-влак, поснак ӱдырамаш-влак икшывышт дене, моткоч шукын улыт ыле. Вуйшӱдышым ыштымекышт, пеленышт наҥгаеныт. Санденак вуйышкышт тудым пижыктен коштшо-влак площадьыште шукын койыч.
А тиде жапыште лӱмын келыштарыме сценыште усталык коллектив-влак концертым ончыктеныт.
Ойыртемалтше-влакым саламленыт
16 шагат эрталтымеке, пайремлан пӧлеклалтше торжественный мероприятий тӱҥале. Еш, йӧратымаш да икте-весылан ӱшанле улмо кече дене погынышо-влакым Марий Эл вуйлатыше Юрий Зайцев саламлыш.
– Мемнан обществын негызше – пеҥгыде еш, чын йӧратымаш да икте-весылан ӱшанле лиймаш. Тиде пайрем лачак ты поянлыкым почын ончыкта, нине умылымаш-влакын илышыштына моткочак кӱлешан улмышт нерген мыланна ушештара. Россий президент Владимир Владимирович Путин элыштына шуко шочшан еш-влакым чапландараш ӱжеш. Еш-влак ий гыч ийыш утларак йочам ышташ кумылаҥыт. Тидыже эн ончычак еҥ-влакын кугыжаныш велым полыш улмым шижмышт нерген ойла.
Таче ме тукым гыч тукымыш куснен толшо йӱла-влакым пагалымынам ончыктена. Тек нуно йоча ден уныка-влаклан пример лийыт да ончыкыжым шке пеҥгыде да пиалан ешыштым чоҥаш кумылаҥдат, – палемден республик вуйлатыше.
Тылеч вара Юрий Зайцев ойыртемалтше еҥ ден еш-влаклан наградым да окса сертификатым кучыктыш. Звенигово район Кожласола гыч Елена Пыркова «Героиня-ава» чаплӱм да орден дене палемдалте. Сценыш шуко шочшан ава шкетын огыл, а пелашыже да шочшыжо-влак дене пырля лекте.
Йошкар-Ола гыч Елена ден Эдуард Александровмыт «Родительская слава» орденын медальже дене палемдалтыч. Нунат пайремыш уло ешышт дене толыныт ыле.
Нине кок ешланат награде деч посна республик вуйлатыше окса сертификатым кучыктыш.
Марий Эл Республикын Вуйлатышыжын Почетан знакше дене Халида Гайнуллина, Дмитрий Долгоруков, Юрий Маков, Раисия Попова, Любовь Фролова палемдалтыч.
Еш-влаклан чылаштлан Йошкар-Оласе да Марий митрополит Иоаннын благословитлымыж почеш еш-влакым аралыше шнуй Петр ден Феврониян юмоҥаштым кучыктышт. Южыштлан тудым митрополит шкежак пӧлеклыш.
Эше 17 ешым «За любовь и верность» медаль дене палемдышт. Тыгак «Идалыкын ешыже» республиканский конкурсышто сеҥыше 6 ешым да кодшо кечылаште гына мужыраҥше-влакым саламлышт. Нуным да погынышо-влакым марий эстрадын артистше-влак шке сылне мурышт дене куандарышт.
Торжественный ужаш деч вара «Время пришло» группо концертым ончыктыш. Пайрем поро кумылым ончыктымо «Быть добру» фондын куштымаш марафонжо дене мучашлалте.
Любовь Камалетдинова
