Пермьыште Юл кундем федеральный округын 14 регионжо гыч законодательный орган-влакын вуйлатышышт ден молодёжный парламент-шамычын председательышт вашлийыт.
1 июньышто тыште РФ Юл кундем федеральный округысо субъект-влакын кугыжаныш кучемыштын законодательный органлаштын ассоциацийыштын LXVIII заседанийышт лиеш. Тушто Марий Эл Кугыжаныш Погынын председательже Анатолий Смирнов участвоватла.
Заседанийыште каҥашышаш тӱҥ теме-влак ял кумдыкым вияҥдыме да промышленностьыш у технологийым шыҥдарыме дене кылдалтыныт. Тыгак Пермь крайын Законодательный Погынжо ден Саратов областьысе Думо коклаште Пашам пырля ыштыме нерген келшыкым ышташ палемдыме.
А эрла, 31 майыште, самырык парламентарий-влак – Округысо самырык парламент-шамычын ассоциацийыштын йыжыҥъеҥышт – шке заседанийыштым эртарат. Нуно самырык тукымын шкем ончыктен кертме йӧнжӧ, верысе кӱкшытыштӧ мер-политике илышыште да кундем дене кылдалтше проблемым решатлымаште участвоватлен сеҥыме йодыш-влакым ончат.
Мероприятийын кышкарыштыже уна-шамыч Пермь крайысе вӱдышӧ промышленный предприятий ден шинчымашым пуымо рӱдерлаште, ты шотыштак «Пермские моторы» ОДК-ште, Пермь науко-производство приборым чоҥымо компанийыште, «Кванториум Фотоника» технопаркыште, ПНИПУ-н аэрокосмический факультетыштыже, «Рациональное недроиспользование» науко-образовательный рӱдерыште, лийыт. Тылеч посна законодательный орган-влакын спикерышт ден молодежный парламент-шамычын председательыштым «Россий студент шошо» национальный финалыш ӱжыныт.
М.ИВАНОВА
