Верысе производство
Пеҥгыдым да чаплым
Тений Йошкар-Оласе йолчием фабрикыште у производство цехым пашаш колтат.
Фабрикыште Марий Эл вуйлатыше Юрий Зайцев лийын, кызытсе производствым да чоҥалтше у цехым ончал савырнен. Тудо тыгак ямде продукцийым тергыме лабораторийыш пурен. Тушто тудым тестироватлат да качествыжым тергат.
Предприятийын генеральный директоржо Сергей Каморкин ямде продукцийын ассортиментше дене палдарен. Тыште аралтышан йолчиемым ямдылат да Россий рынке ден Казахстаныш колтат.
Марий Эл вуйлатыше палемден: Йошкар-Оласе йолчием фабрике – тиде пеҥгыдылыкым, качествым да ӱшанлыкым ончыктышо пример.
«Тендан вияҥмыда чынжымак шижалтеш. Ныл ий жапыште предприятий производство кумдыкшым 4 гыч 13 тӱжем квадратный метр марте кугемден. Кызыт эше 9 тӱжем квадратный метр кумдыкан у цех чоҥалтеш. Тидыже ассортиментым кумдаҥдаш да паша лектышым нӧлталаш полша», – каласен Юрий Зайцев.
Предприятий йолчиемжым нефтьым перерабатыватлыше, металлургий, энергетике, кочкыш промышленность, транспорт да моло услугым пуышо предприятий-влаклан колта. Фабрикыште тыгак «ликвидатор-влаклан» костюмым ямдылаш тӱҥалыныт, кӱкшыт гыч камвочмо деч аралыше средствым ышташ шонат.
Фабрике 1946 ийыште негызлалтме годсек шкенжым ӱшанле производитель семын ончыктен, эреак у технологийым шыҥдарен толын. Тыште 900 утла еҥ ышта. Тудо Российыште спецвургем ден йолчиемым, тыгак индивидуально аралалтме средствым лукшо кугу производительын – «Техноавиа» фирма» компанийын – производство куатышкыже пура.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: Йошкар-Оласе йолчием фабрикыште.
Денис Речкинын фотожо.
