Марий Элысе идымвечылашке 200 тӱжем чоло тонн угинде пурен.
Ялозанлык да кочкыш сату министерстве гыч пурышо увер почеш, арня тӱҥалтышлан 62,1 тӱжем гектар гыч шурным поген налме. Тидыже шийшаш пӱтынь кумдыкын 45 процентше лиеш. Ӱмаште тиде жапланак 72 процент гыч поген налме ыле. Кажне гектарлан шотлымаште кокла лектыш – 32 центнер, кодшо ийын 24 центнер лийын.
Ончылно Морко ден Звенигово район-влак улыт. Тыште 68-56 процент шурным шийме. Параньга ден Советский район-влак почеш кодыт, 37-34 процент гыч поген налыныт. Эн сай лектыш – Медведево районышто. Тыште пырчым гектар еда кокла шот дене 48 центнерым шийыт, Оршанке районышто – 43 центнерым. Звенигово, Параньга, Марий Турек районлаште лектыш эн изи, 24-25 центнер дене шийыт.
Кокияш пырчан культурым ӱдымӧ паша тений начарынрак ушна. Чылаже 42 тӱжем тонным ӱден кодыман гын, арня тӱҥалтышлан урлыкашым 14 тӱжем гектарыш гына вераҥдыме, планым 33 процентлан темыме. Ӱмаште тиде жапланак 31 тӱжем гектарыш ӱдымӧ, планым 72 процентлан темыме ыле.
Озанлык-влак кургым умбакыже ямдылат. Шудым шапашлыме планым 107 процентлан темыме, сенажым – 96, силосым – 59 процентлан.
Вячеслав Смоленцевын фотожо.
