УВЕР ЙОГЫН

Марий Элыште ече-роллер трассым ыштат

Марий Эл вуйлатыше А.Евстифеев спортын кумдан шарлыше видше, ече дене куржталмашын вияҥмыж нерген Российысе ече федерацийын президентше Елена Вяльбе дене каҥашен. 

Олимпийский модмашын кум гана чемпионжо дене вашлиймаш 26 апрельыште Правительстве пӧртыштӧ эртен. Тушто тыгак Марий Эл Республик правительстве председательын икымше алмаштышыже М.Васютин, самырык-влакын политикышт, спорт да туризм министр Л.Батюкова лийыныт.

– Ме тендам куанен вашлийына, результатдам пагалена, спортышто чолган ыштыме пашадам аклена. Эртыше лӱмгечыда дене шокшын саламлена, – манын республик вуйлатыше да Елена Вяльбелан пеледыш аршашым кучыктен.

А.Евстифеевын палемдымыж почеш, таче кечын республикыште ече дене спорт школ да рӱдерлаште тӱжем утла еҥ шотлалтеш. Нунын дене витле утла тренер пашам ышта. Спортын ты видше ял ден селалаштат, олалаштат вияҥеш. Верысе ечызе-влакым тудо пеҥыде койыш-шоктышан да кӱкшӧ результатыш шуаш тыршыше улыт манын палемден.

Вашлиймаште Марий Элыште ече-роллер трассым ышташ лийме, ече дене верысе федерацийын пашашкыже вашталтышым пурташ кӱлмӧ нергенат ойленыт.

– Тендан дене ола воктенак чапле ече базе уло. Туштак кеч кум километр кужытан ече-роллер трассым ышташ гын, пеш сай лиеш ыле, – темлыме семын каласен Е.Вяльбе А.Евстифеевлан. – Тидым 3-5 ийыштат ыштен шукташ лиеш. Тыге тушто спортсмен-влак идалыкын кеч-могай жапыштыжат ямдылалтын кертыт.

Тыгодым Е.Вяльбе ече федерацийын лушкыдырак пашажымат палемдыш.

– Тидыже тушто пашам ыштыше еҥ дене огыл, а шийвундо уке дене кылдалтын. Ты вид дене верысе федерацийым ӧрдыж гыч толшо еҥ вуйлатышаш огыл. Верысак лийже да чылажат шот дене ышталтше манын шонена, – ойлен Е.Вяльбе.

Марий Эл вуйлатышат ты йодышым варалан кодаш огыл манын каласен да ече-роллер трассым лишыл жапыште ямдылаш тӱҥалаш лийме нерген палдарен.

– Тидлан проект кӱлеш. Сандене 3-5 ий нерген огыл ойлыман. Сентябрьыште 2019 ийлан бюджетым ямдылаш тӱҥалыт. Ме тидлан средствам ойырышаш да трассым чоҥышаш улына. Базыжат сай лийшаш. Спорт эн ончылно лийшаш, – мане А.Евстифеев.

Республик вуйлатыше тыгак Волжскышто сай ече базым чоҥымо нерген ушештарен. Тудыжым республикыште кугыт шот дене кокымшо олаште спорт полатым олмыктымо деч вара ышташ тӱҥалыт.

Елена Валерьевна самырык-влакын политикышт, спорт да туризм министр Л.Батюкова дене пырля Йошкар-Олаште изирак экскурсийым ыштен: тачысе саманлан келшыше спорт объект-влакым ончен, национальный кочкыш дене сийлалтын. Тыгак Е.Вяльбе рӱдола воктенсе «Корта» ече базыште лийын. Тушто Марий Элыште ече спортлан вуйын шогышо тренер-шамыч, тыгак спортсмен-влак дене вашлийын.

Е.Эшкинина.

Опубликовать в Одноклассники

Добавить комментарий