30 сентябрьыште Йошкар-Олаште Лувем донор-влакын федерал регистрыштым вияҥдаш полшымо шот дене Лувем донорствын #ДавайВступай всероссийский марафонжо эрта.
Тудо, 4 сентябрьыште Бурят Республикысе Улан-Удэште стартым налын, Российын эше 72 олаштыже лиеш да 10 ноябрьыште мучашлаштеш.
Проект Лувем да гемопоэтический стволовой клетке донор-влакын федерал регистрыштым ыштыме кечылан, тыгак Лувем донор-шамычын тӱнямбал кечыштлан (сентябрьын кумшо шуматкечынже палемдалтеш) пӧлеклалтын.
Йошкар-Ола – марафоным эртарыме кокымшо вер.
Эн кугу тӱткыш – лувем донорствын амбассадоржо да олаласе эн сылне вер-влак шотышто опытан спортсмен Артем Алискеровын (снимкыште) 42 километр кужытан мономарафонжылан. А.Алискеров лейкозым (вӱр ракым) сеҥен да химиотерапийын 31 курсшым эртен. Инвалидностьын I группыштыжо улшо самырыкеҥ, шкенжым сеҥен да таза еҥлан шуаш лийдыме у деч у кӱкшытлам налын, лувем донорствын кӱлешлыкше нерген кумдан ойла.
#ДавайВступай донор акций Патриарший площадьыште донор-влаклан палемдалтше куснылшо комплексыште эрта. Тушто кумылан кажне еҥ биологический образецшым генетике анализлан сдатлен да Лувем донор-шамычын федерал регистрышкышт пурен кертеш.
Донор марафон калыкым лувем донорство дене кумдан палдарыме да самырык-влакым Онкогематологический пациент-шамычлан альтернативдыме медицине полышым пуымо федерал регистрын программышкыже ушнаш кумылаҥдыме шонымаш дене эртаралтеш.
Йошкар-Олаште палемдыме мероприятийын радамже тыгай:
7-14 шагат – лувем донорствын амбассадоржо Артем Алискеровын оланан эн сылне верже-влак мучко (Вӱрым налме да пуымо республиканский станций гыч тӱҥалын Марий кугыжаныш университет марте) 42 километр кужытан мономарафонжо;
10-14 шагат – граждан-влакым Лувем донор-шамычын федерал регистрышкышт кумылаҥден пуртымо #ДавайВступай донор акций (Вӱрым налме да пуымо республиканский станций: Йошкар-Ола, Пролетарский урем, 66-шо пӧрт да Патриарший площадь);
14-15.30 шагат – «Мый кертам. Мый ыштышаш улам. Мый – лувем донор» интерактивный лекций (Марий кугыжаныш университет, Шолшо точкын площадкыже: Красноармейский урем, 71/1-ше пӧрт, 1-ше пачаш). Тушто Федеральный регистрын спикерже Наталья Малышева, «Волонтёр-медик-влак» всероссийский мер толкынын еҥже ден Вӱр службын пашаеҥже-влак выступатлат.
17 шагат – проектын командыже Киров олашке тарванен кудалеш.
М.ИВАНОВА
Фотом интернет гыч налме
