Марий Элым вуйлатыше Сарзе Чап монумент да Курымашлык тул воктеке пеледышым пыштен.
1941-1945 ийласе Кугу Ачамланде сарыште Сеҥымашлан 80 ий темме лӱмеш торжественный митинг Марий Элын рӱдолаштыже Сарзе Чап монумент воктене эртен.
«Таче пеш кугу кече. Миллион дене салтак ден офицер Шочмо элнан эрыкше верч илышыштым пуэныт. Чыла калык тушман ваштареш ик ой дене пеҥгыдын шогалын. Президент Владимир Владимирович Путин Кугу Ачамланде сарыште Сеҥымашым россий да совет калыкын триумфшо семын палемден. Шочмо эл верч вуйым пыштыше-влак ончылно вуйнам савена», – саламлыме мутым ойлымыж годым палемден Юрий Зайцев.
Мероприятийыш толшо-влакым Йошкар-Ола мэрын пашажым жаплан шуктышо Антон Трудиноват саламлен.
«Таче кажне ешыште нарынчалгыше фотографий гыч ончышо айдеме – историй – уло. Тунамсе илыш дене кылдалтше событий-влакым нигӧ амыртен ынже керт манын, чын историйым тукым гыч тукымыш кӱсынлена», – манын тудо.
Митингыште специальный военный операцийын участникше, штурмовой разведрото командирын алмаштышыже, гвардий изирак сержант Александр Архипов лийын.
«Мемнан кочана ден кугезе кочана-влак чумыр Европын фашизмжым ик гана сеҥеныт, но икмыняр жап гыч тудо калыкнан куатшым угыч тергаш шонен пыштен. Нунын нимо шот огеш лек. Элым, республикым, олам вуйлатыше-влакын, чумыр калыкын полшымышт, йоча-шамычын серышышт да сӱретышт кумылаҥдыме дене ме сеҥена. Сеҥымаш садак мемнан пелен лиеш!» – каласен тудо.
Кугу Ачамланде сарын сӧй пасуштыжо вуйым пыштыше салтак ден офицер-влакым ик минут шып шоген шарналтыме деч вара Марий Элым вуйлатыше ден митингын участникше-шамыч Сарзе Чап мемориал да Курымашлык тул воктеке пеледышым пыштеныт.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
