Марий Эл вуйлатыше Пеледыш пайремым эртараш ямдылалтме нерген указыш кидпалыжым пыштен.
Тений марий калыкын ик эн йӧратыме пайремже оласе типан посёлкылаште да ялысе округлаште 3 июньышто эртышаш. 10 июньышто тудым район ден оласе административный рӱдерлаште палемдат. Марий рӱдолаште Пеледыш пайрем 17 июньышто лиеш.
100 ий ончыч Пеледыш пайремым Марий автономный областьын пашазе калыкшын кечыже семын увертареныт. Тудым палемдыме кечылан тунам марий кечышотын Семык пайремжым – изарням – ойырен налыныт.
1923 ий 24 майыште Марий автономный областьын рӱдолаштыже, Краснококшайскыште, ты кугу мероприятий эртен. Организаторжо-влак коклаште Сергей Чавайн, Яков Майоров-Шкетан, Шабдар Осып, Иван Палантай да сылнымут, тӱвыра, сымыктыш аланыште тыршыше моло лӱмлӧ еҥат лийыныт.
2023 ийыште Пеледыш пайремым палемдыме программе поснак поян лийшаш. Регион вуйлатыше тудлан сайын ямдылалташ да чыла лӱдыкшыдымылык мерым шотыш налын эртарен колташ кӱштен.
Марий Эл вуйлатышын Информационный паша шотышто пӧлкажын уверже негызеш С.Носова ямдылен.
