Марий Элыште тений чодыра пожар шагалемын.
Марий Эл вуйлатыше Юрий Зайцев республикысе правительствын заседанийжым эртарен. Икымше йодыш почеш тымарте пожар лийын кертме пагытым иктешленыт. Тачысе кечылан республикыште 18 чодыра пожар лийын. Кодшо ийысе тыгаяк жап дене таҥастарымаште ятырлан шагал. 2024 ийыште тул 31 гана ылыжын.
«Тиде – комплексный пашан лектышыже. Чодыраште пожар тӱҥал кертме патрулирований, пожарный вышке-влак, авиаций полшымо дене эскералтеш. «Лесохранитель» аппаратно-программный комплексымат кучылтыт. «Экологий» нацпроект почеш республикыш толшо у техникат пеш писын тул ылыжмым пален налаш да йӧрташ полша. Пытартыш куд ийыште 203 миллион теҥгелан 53 тыгай техникым, 539 оборудованийым налме», – палемден Юрий Зайцев.
Тений чодыра пожар-влак тӱҥ шотышто тулым эскерыде кучылтымылан кӧра ылыжыныт. Икмыняр вере кӱдырчан йӱр тидлан амалым ыштен.
Марий Элын пӱртӱс поянлык, экологий да йырым-йырысе средам аралыме шотышто министр Алексей Киселевын докладыштыже палемдыме почеш, чыла 18 пожарым икымше кечынжак йӧртымӧ. Тидлан 55 техникым кучылтмо да 169 еҥым ушымо.
Тыгак заседанийыште республикыштына илыше ик еҥын эҥер дене ийын коштмашым организоватлашлан пожар лийын кертме лӱдыкшӧ улмо пагытыште чодыраш пурен-лектын коштмо шотышто йодмашыжым ончен лектыныт. Иктешлымаш почеш, республикыште пожар лийын кертме 4-ше классан лӱдыкшӧ улмо годым лесничествын чеклашкыже транспорт дене пураш чарыме, тыгак тулотым ылыжташ, тул ӱмбалне кочышым шолташ, пиротехникым кучылташ огеш лий.
«Кундемнан пӱртӱс лоҥгашкыже толаш кумылан-влакым ме пагалена, но ме эн ончыч лӱдыкшыдымылык нерген шонена. Правил-влакым пудыртымаш экологийлан лӱдыкшым луктын кертеш, да штрафымат тӱлаш логалеш. Аралыза чодырам, тудо мемнан поянлыкна», – палемден регион вуйлатыше.
Ушештарен кодыман, 18 апрель гыч Марий Элыште пожар ваштареш виктаралтше посна режимым пуртымо.
Марий Эл вуйлатышын пресс-службыжын уверже негызеш Светлана Носова ямдылен.
