Марий Эл вуйлатыше Юрий Зайцев «Троллейбус транспорт» предприятийыште лийын. Тудо парк кумдыкым, профилакторий цехым, техобслуживаний, капитально олмыктымо да чиялтыме участкылам ончен савырнен.
«Троллейбус транспорт» ГУП-ын директоржо Сергей Деряевын мутшо почеш, предприятий 11 троллейбус да 10 автобус маршрутым обслуживатла. Тачысе кечылан 105 троллейбус да 90 автобус кудалыштеш. Кажне кечын 55 тӱжем наре пассажирым шупшыктат. 2023 ийыште – 14,6 миллион еҥым. 2024 ийыште, вучымына семын, пассажир-влакын чотышт 30 процентлан кушкеш да 19 миллионыш шуэш. Предприятийыште 700 еҥ пашам ышта, тышеч – 250 водитель.
«Таче ме предприятийын пашаштыже вашлиялтше нелылык-влак да нуным кораҥдыме йодышлам каҥашенна. Эн ондак, тиде пашадар, келшыше пашадар лиеш гын, пашаеҥ-влакат кодыт. Мутат уке, предприятийым кеч-кузе гынат арален кодыман. Тылеч ончыч предприятийлан ме эре дотацийым ойыренна, сандене лекше йодышым писын решатлен колташ лийже манын, тудым республикысе казнаш кусарена. Кадр шотышто ойлышна, тидын нерген мыланемат соцсетьлаште возат. Палем, йодыш эркын-эркын решатлалтеш. Кызыт, чаманаш логалеш, шуко сферыште специалист-влак огыт сите. Тыште пашам ыштыман», – палемден Юрий Зайцев вашлиймаш годым.
Троллейбус паркын пашаеҥже-влаклан тауштымыж годым манын: «Транспорт-влакым уэмдыме шотышто ойлаш гын, раритет-влак, конешне, улыт. Инженер да технике пашаеҥ-влаклан, тошто техникым уэмдыше, тошто гыч ялт у гайым ыштыше еҥ-влаклан таум ойлыман». Тылеч вара Юрий Зайцев предприятийын коллективше дене вашлийын.
Республикын вуйлатышыже подвижной составым уэмдыме йодышын кӱлешлыкшым посна ойырен каласен. 2024–2025 ийлан инфраструктур казна кӱшеш кредит йӧн дене 5 троллейбусым налаш кугыжаныш контрактым ыштыме. Мутшо почеш, 2030 ий марте федеральный полышлан кӧра парк 90 троллейбуслан уэмдалтшаш.
Федеральный полышым пуымо кышкарыште тыгак 160 автобус ешаралтшаш. Тыге автобус паркын чотшо 250 подвижной состав марте шушаш.
Марий Эл Республикым вуйлатышын
администрацийжын пресс-службыжын уверже негызеш
Л.СЕМЕНОВА ямдылен
Д.Речкинын фотожо/ Пресс-службо
