14 февральыште Марий Элыште регион кӱкшытан «Самырык профессионал-влак» (WorldSkillsRussia) X открытый чемпионат тӱҥалын.
Марий Эл образований да науко министр Лариса Ревуцкая палемден: «Таҥасымаш ий гыч ийыш кумдаҥ толеш, тушко ушнышо участникын чотшо шукемеш да компетенций-шамыч ешаралтыт. Чемпионатыш у направлений-влак республикын йодмашыжлан кӧра пурталтыт. Тенийысыште самырык профессионал-шамыч чумыр налмаште витле компетенций дене мастарлыкым ончыктат, тышеч лу направленийже у!»
У компетенцийла дене площадке-шамычым почаш «Образований» национальный проектын «Самырык профессионал-влак» федерал проектшылан кӧра йӧн лийын. 2021 ийыште Марий радиомеханический техникумышто «ЧПУ-ан станоклаште фрезер паша», «Промышленный механике да монтаж», «Облачный технологий» дене площадке-шамыч пашам ышташ тӱҥалыныт.
Марий Элын 2013-2025 ийлан «Образованийым вияҥдымаш» кугыжаныш программе почеш, тыгак социальный партнёр-шамычын полшымышт дене «Сварке технологий», «Газ оборудованийым монтироватлымаш да тудым кучылтмаш», Смете паша», «Финанс», «Банк паша», «Чодырам йӧрыктышӧ» направленийлам почмо.
Кугыжаныш да муниципальный службо колледжын тӱналтышыж почеш тений «Пожар лӱдыкшыдымылык» компетенций дене таҥасымаш эртаралтеш.
У площадкылам почмо «Самырык профессионал-влак» толкынын вияҥын толмыжо, пашазе специальность-влак дене ончыкылык профессионал-шамычым ямдылымаште тудын кӱлешлыкше нерген ойла.
Г.Кожевникова
