Шернур район Марисола школышто лиймына годым тунемме верын пырдыжлаштыже кечыше верысе сӱретче-влакын радынаштым тӱткынрак шымлаш йӧн лектын. Ятыржым Алексей Григорьев сӱретлен, тыгак тунемшыже-шамычын пашаштымат ужаш лиеш.
Тыге, сӱрет-влакым шымлен, А.Григорьевын урокыштыжо лияш кумыл лекте. Директор деч йодын, ИЗО занятийыш пурышна.
Доскаш ончална айдемын чурийжым пор дене сӱретлыме, тыгак чурийым могай радам дене сӱретлаш кӱлмым ончыктымо, графике сынан сӱрет-влакым сакыме. Туныктышын ӱстембалныжат ятыр сӱрет кия.
Алексей Иванович йыр шогалын, кажне тунемше деч ала-мом йодын. Вашмутым налмеке, йоча парт коклаште тыршен сӱретлаш тӱҥалын. Коеш, икшыве-шамыч туныктышыштым пеш йӧратат, пагалат.
Урокышто шинчыме годым, тунемше-шамычын ИЗО занятийыш кумылын коштмыштым вигак шижат. Очыни, вес семынже лийынжат ок керт, вет Алексей Иванович шке пашажлан уло чонжым пуа.
Алексей Иванович Григорьев – профессионал сӱретче, туныктышо. Тудо ты селаштак шочын. Школым тунем лекмеке, 1993 ийыште Йошкар-Оласе художественный училищыште «Живопись» отделенийым тунем пытарен. Шупашкарыште кугыжаныш педагогике университетыште художественно-графический факультетыште шинчымашыжым нӧлтен.
А. Григорьевын пашажым ятыр ончерыште ужаш лиеш, тыгак тудо шуко книга комым сылнештарен. Шкенжын тематический ончержымат чумырен.
М.СКОБЕЛЕВ,
Л.ШАБДАРОВА
М.Скобелевын фотожо
Снимкылаште: А.Григорьев – урокышто.
