Пермь край Суксун район Кызганде ялысе «Марий национальный тӱвыра рӱдер» мер организацийым вуйлатыше Надежда Саватеевна Спиридоновам ты районын «Почётный гражданинже» чап лӱм дене палемденыт.
Удостоверенийым, грамотым да оҥыш пижыктыме палым лишыл жапыште эртышашлык «В Суксун – со своим самоваром» фестивальыште кучыктышаш улыт. Тидын нерген Пермь ола ден Пермь кундемысе марий-влакын соцкыл лаштыкыштыже увертарыме. Надежда Саватеевна 47 ий школышто тӱҥалтыш класслаште туныктен. 2008 ий гыч тудо тусо марий тӱвыра рӱдерым вуйлата. Кундемыште марий йылмым, тӱвырам, йӱлам шарен толеш. Лач ты рӱдерыште регион-влак кокласе кӱкшытан марий шӱлышан мероприятий-влак эртаралтыт.
С.Носова
Снимкыште: Н.Спиридонова
