1 март гыч Марий Эл вуйлатышын эл кӧргышто да эл деч ӧрдыжкӧ лектын коштмо туризм шотышто грант конкурсыш ушнаш йодмашым Молодёжный политике, спорт да туризм шотышто министерствыш пуаш лиеш.
Кӧ тидым ыштен кертме шотышто министерствыште умылтареныт. Тушко казенный учрежденийлан огыл шотлалтше юридический лица, бюджет, автоном учреждений, туризм пашам вияҥдыше да республикыште регистрироватлалтше предприниматель-влак ушнен кертыт. Ик йодмашым гына пуаш лиеш. Тыгай номинаций-влак темлалтыт:
- Марий Эл кумыдыкышто турист-влаклан ончыктымо объектым тӱзатымаш да (але) уэмдымаш. Грантын кугытшо — 300 тужем теҥге.
- Туризм сферыште рекламе-увер проект. Грантын кугытшо – 300 тӱжем теҥге.
- Сувенир продукцийын линейкыжым ыштымаш. Грантын кугытшо – 300 тӱжем теҥге.
Тӱрысшӧ конкурслан 900 тӱжем теҥге грант ойыралтын. Йодмашым 30 март марте пуаш лиеш.
С.Носова
