Российын Паша да пашам муаш полшымо федеральный службыжо тений январь гыч пашам законлан келшыдымын ыштыктыше пашам пуышо-шамычын реестрыштым ышташ тӱҥалын.
Тушко паша законодательствым пудыртышо да айдемым пашашке официально огыл налше компаний-шамычым пуртат. Тиде паша отношенийым гражданско-правовой шотан ойпидыш дене вашталтыме але айдемым пашашке паша ойпидыш деч посна налме факт-влак лийын кертыт.
Пашам пуышо-влакым палемдыме реестрыш административный правам пудыртымо нерген пунчал негызеш пуртат. Тушто компанийын лӱмжым але амалкалчын фамилийжым, лӱмжым да ачалӱмжым, ИНН-жым, реестрыш пуртымо кечым да пунчалым ончыктат.
Законым пудыртышо пашам пуышо-влак нерген увер реестрыште пытартыш нарушений деч вара ик ий лиеш. Тылеч посна, административный правам пудыртымо нерген пунчалым шӧрат гын, компанийым реестр гыч жап деч ончыч луктын кертыт.
Марий Элын Паша шотышто кугыжаныш инспекцийже ушештара: пашам пуышын паша правам пудыртымыж годым пашаеҥ 8-902-432-77-60 номеран телефон дене шокшо линийыш йыҥгыртен кертеш.
Маргарита ИВАНОВА
