Регионым виктарыше рӱдерыште Марий Эл образований да науко министр Л.Ревуцкая дене вияш эфир лийын.
Тушто Лариса Анатольевна тенийысе ЕГЭ, приёмный кампаний, кундемыштына образований системым вияҥдыме дене кылдалтше йодыш-шамычлан вашештен.
Министрын мутшо почеш, образовательный организаций-влак шинчымашым тергыме тургымлан ямде улыт. ОГЭ-н тӱҥ этапше 19 майыште тӱҥалын, а Иктешлыше кугыжаныш экзамен – 26 майыште.
«Экзаменым сайын кучышо выпускник-влаклан умбакыже шинчымашым налаш йӧн республикыштынак уло. Ссуз ден вузлаште тунемаш пурымо контрольный цифр кугемын. Кыдалаш профессионал образований программылан федерал бюджет кӱшеш 5 945 утла бюджет вер уло, а республикын бюджетше кӱшеш – 4805 вер. Иктешлен каласаш гын, ӱмашсе деч 65 верлан шукырак. 2022-2023 тунемме ийлан вузлаште федерал бюджет кӱшеш 4277 верым ойырымо, тидыже эртыше тунемме ий деч 100 верлан шуко. Республикна деч ӧрдыжкӧ мемнан выпускник-влак (11-ше классым тунем пытарыше) шукыжым тугай вузыш тунем пурат, могай мемнан регионышто уке: мутлан военный, МВД, МЧС направленийла дене). Пелыже утла Марий Элыштак кодыт да сай качестван профессионал образованийым налыт», – каласен Лариса Анатольевна.
Тудо тыгак республикысе образований системым уэмден вияҥдыме нерген ойлен, ты паша «Образований» национальный проектым илышыш пуртымо дене кылдалтын. Кызыт образовательный организаций-шамычлан у оборудованийлам налыт, тунемме верлам олмыктат. Тений у тунемме ийлан 119 у инфраструктур объект ямде лийшаш.
Г.Кожевникова
